ރާއްޖޭގައި ގަވައިދާ ހިލާފަށް ތިބި އިންޑިއާގެ ސިފައިން ބޭލުމަށް ގޮވާލާ އިދިކޮޅު ޕީޕީއެމް އިން މިއަދު ހަވީރު ބޭއްވި އެއްވުމުގެ ތެރެއިން 11 މީހަކު ހައްޔަރުކޮށް، ފުލުހުންގެ ދައުރު އަދާކުރުމަށް ހުރަސް އެޅި ކަމުގެ ތުހުމަތު ފުލުހުން ކޮށްފި އެވެ.

އިދިކޮޅު ކޯލިޝަންގެ ރަސްމީ އޮފީސް ކުރިމަތިން ބޮޑުތަކުރުފާނު މަގުގައި ކުރިއަށް ދިޔަ ހަރަކާތުގައި ބައިވެރިވި އެ ދެ ޕާޓީގެ ސަޕޯޓަރުން ވަނީ އިންޑިއާ ސިފައިން ފޭބުމަށް ގޮވާލާ އަޑުއުފުލާފަ އެވެ.

ފުލުހުން ބުނީ މި ހަރަކާތުގެ ތެރެއިން 11 މީހަކު ހައްޔަރުކޮށްފައިވާ ކަމަށެވެ. އެއީ ނުވަ އަންހެނުންނާއި ދެ ފިރިހެނުންނެވެ.

ފުލުހުން އެ މީހުންގެ މައްޗަށް ކުރަނީ ފުލުހުންގެ ދައުރު އަދާކުރުމަށް ހުރަސް އެޅި ކަމުގެ ތުހުމަތެވެ.

ހައްޔަރު ކުރި މީހުންގެ ތެރޭގައި އިދިކޮޅުގެ ހަރަކާތްތައް ރާއްވާ ހިންގުމުގައި އިސްކޮށް ހުންނެވި ހޯރަފުށީ ދާއިރާގެ ކުރީގެ މެންބަރު މުހައްމަދު އިސްމާއިލް ވެސް ހިމެނެ އެވެ.

އިންޑިއާ ސިފައިން ބޭލުމަށް ގޮވާލާ މިއަދު ފ. ނިލަންދޫގައި ވެސް ހަރަކާތްތަކެއް ކުރިއަށް ގެންދިޔަ އެވެ. އެ ހަރަކާތުގައި އިންޑިއާ ސިފައިން ބޭލުމަށް ގޮވާލާ ތައްޔާރު ކުރަމުންދާ ޕެޓިޝަންގައި ސޮއިކުރުން ކުރިއަށް ގެންގޮސްފައިވެ އެވެ.