މުމްބާއީ (06 ޖެނުއަރީ) އިންޑއާގެ މުމްބާއީގައި މުސްލިމް އަންހެނުންނަށް ފުރައްސާރަކޮށް އޮންލައިން ޕްލެޓްފޯމެއްގައި ނީލަން ކިޔާ މައްސަލައަކާ ގުޅިގެން ތިން މީހަކު ހައްޔަރު ކުރެވިފައިވާ ކަމަށް މުމްބާއީ ފުލުހުން ބުނެފި އެވެ.

ގިޓްހަބް ކިޔާ އޮންލައިން ފްލެޓްފޯމެއްގައި ގިނަ އަދަދެއްގެ މުސްލިމް އަންހެނުން އެމީހުުންގެ ރުހުމާ ނުލާ ނީލަން ކިޔާފައިވާއިރު މައްސަލަ ފެންމަތި ވުމުން މިހާރު އެ ވެބްސައިޓް ވަނީ ހުއްޓުމަކަށް ގެނެސްފަ އެވެ.

މައްސަލަ ތަހުގީގު ކުރާ މުމްބާއީ ފުލުހުން ބުނީ މި މައްސަލައާ ގުޅިގެން 21 އަހަރުގެ ދެ ފިރިހެެނުންނާއި 18 އަހަރުގެ އަންހެނެއް ހައްޔަރުކޮށް ސުވާލު ކުރެވެމުންދާ ކަމަށެވެ.

ނީލަން ކިޔުނު އަންހެނުންގެ ތެރޭގައި މުމްބާއީގެ ނޫސްތަކުގައި މަސައްކަތްކުރާ މުސްލިމް ޖާނަލިސްޓުންނާއި އެނޫންވެސް ފާހަގަ ކުރެވޭ ފަރާތްތައް ހިމެނެ އެވެ.

"މިއީ ވަރަށް ބޮޑު ޖަރީމާއެއްގެ ދަށުން ހިންގާ ކަމެއް. މިކަމުގެ ފުރިހަމަ ތުހުގީގެއް ކުރެވޭނެ،" މީޑިއާތަކާ ވާހަކަ ދެއްކި ފުލުހުންގެ އޮފިސަރަކު ބުންޏެވެ.

އިންޑިއާގެ އާބާދީގެ 14 ޕަސެންޓަކީ މުސްލިމުންނަށް ވީއިރު މައިނޯރިޓީ ކޮމިއުނިޓީއެއްގެ ގޮތުގައި މުސްލިމުންނަށް އެކި ކަހަލަ ދުއްތުރާތައް ކުރިމަތި ކުރުވަމުންދެ އެވެ. -- އަލް އަރަބިއްޔާ