ބާ ކައުންސިލްގެ މިދިޔަ އަހަރުގެ އާންމު ޖަލްސާ އަންނަ މަހު ބާއްވަން އެ ކުއުންސިލުން ނިންމައިފި އެވެ.

ބާ ކައުންސިލުން ބުނީ އަންނަ މަހުގެ ނުވަ ވަނަ ދުވަހު ބޭއްވުމަށް ނިންމާފައިވާ އަހަރީ އާންމު ޖަލްސާއަށް ރަޖިސްޓްރީވުމުގެ ފުރުސަތު މިހާރު ހުޅުވާލާފައިވާ ކަމަށެވެ.

ކޮވިޑުގެ ހާލަތާ ގުޅިގެން މި އަހަރުގެ ޖަލްސާ އޮންލައިންކޮށް ބާއްވަން ނިންމާފައި ވާއިރި، ޖަލްސާގައި ބައިވެރިވާން ބޭނުންވާ ފަރާތްތަކަށް އޮންލައިންކޮށް https://bit.ly/3AEfkte ފޯމު ފުރާލައިގެން ރަޖިސްޓާ ވެވޭނެ އެވެ. ރަޖިސްޓްރީ ވުމުގެ ސުންގަޑި އަކީ އަންނަ މަހުގެ ހަތްވަނަ ދުވަހު ކަމަށް ވެސް އެ ކައުންސިލުން ބުންޏެވެ.

ބާ ކައުންސިލުން ބުނީ އަހަރީ އާންމު ޖަލްސާ އޮންނާނީ ފެބްރުއަރީ 9 ވަނަ ދުވަހުގެ 4:00 އިން 6:00 އަށް ކަމަށެވެ. މި ބައްދަލުވުމުގައި ކައުންސިލުގެ މިދިޔަ އަހަރުގެ އަހަރީ ރިޕޯޓާއި އޮޑިޓް ކޮށްފައިވާ މާލީ ރިޕޯޓު ފާސްކުރުން އޮންނާނެ ކަމަށް ބާ ކައުންސިލުން ބުނެ އެވެ.

ރާއްޖޭގައި ފުރަތަމަ ފަހަރަށް ބާ ކައުންސިލެއް އެކުލަވާލީ ޖޫން 27، 2019 ގައި ރައީސުލްޖުމްހޫރިއްޔާ ތަސްދީގު ކުރެއްވި ދިވެހިރާއްޖޭގެ ގާނޫނީ ފަންނުގެ ގާނޫނުގެ ދަށުންނެވެ.

ބާ ކައުންސިލްގެ އެގެޒެކެޓިވް ކޮމެޓީގެ މިދައުރުގެ ރައީސަކީ މަޝްހޫރު ގާނޫނީ ވަކީލް މައުމޫން ހަމީދު އެވެ. ނައިބް ރައީސަކީ ކުރީގެ އެޓާނީ ޖެނެރަލް އަބްދުﷲ މުއިއްޒު އެވެ.