އިއްޒަތާއި ގަދަރު ހާސިލް ކުރެވޭނީ އެންމެ މެދުގައި އޮންނަ އެއްބައިވަންތަކަން ހަރުދަނާކޮށްގެން ކަމަށް އެކަމަށް މަސައްކަތް ކުރާ ބަޔަކަށްވުމަށް މިއަދުގެ އީދު ހުތުބާގައި ގޮވާލައްވައިފި އެވެ.

އަލްހާ އީދުގެ ފުރަތަމަ ދުވަސް މިއަދު ފާހަގަ ކުރާއިރު، ރާއްޖޭގައި މީހުން ދިރިއުޅޭ ހުރިހާ ރަށެއްގައި ވެސް އީދު ނަމާދު ވަނީ ކޮށްފަ އެވެ. އަދި މާލެ ސަރަހައްދުގައި ބޮޑު ޖަމާއަތުގެ އިތުރުން 32 މިސްކިތެއްގައި އީދު ނަމާދު މިއަދު ވަނީ ކޮށްފަ އެވެ.

އީދު ނަމާދުގެ ހުތުބާގައި ވަނީ މާތް ﷲއަށް ބިރުވެތިވެ ތަގުވާވެރިވުމަށާއި މި އީދާއެކު ދިރިއުޅުމުގެ ރަނގަޅު އައު ސަފްހާއެއް ހުޅުވާލުމަށް އިލްތިމާސްކުރައްވާފަ އެވެ. އަދި މި އައު ސަފްހާގެ ތެރެއިން އަޅުގަނޑުމެންގެ މިއަދުގެ ހާލަތު މިއަށްވުރެ ރަނގަޅުކުރުމަށް މަސައްކަތް ކުރުމަށް ގޮވާލައްވާފަ އެވެ. ހުތުބާގައި ވަނީ އަޅުގަނޑުމެންނަށް އިއްޒަތާ ގަދަރު ލިބިގެން ވާނީ މުޅި ހަޔާތުގެ ސަމުގާއަކީ އިސްލާމް ދީނާއި އެދީނުގެ ރިވެތި އަހްލާގު ކަމުގައި ހަދައިގެންކަން ފާހަގަކުރައްވާފަ އެވެ.

އިސްލާމްދީނުގައި އީދަކީ ޝަހްވަތްތަކުގެ ފަހަތުން ދުއްވައިގަތުން ނޫންކަން ފާހަގަކޮށް ހުތުބާގައި ބުނެފައިވަނީ އީދު ދުވަހަކީ ކާބޯތަކެތިން ބަނޑު ފުރައިލުންވެސް ނޫން ކަމަށެވެ. އަދި އެއީ މާތް ﷲ ގެ ހައްދުތައް ފަހަނަ އަޅައި ދިއުންވެސް ނޫން ކަމަށްވެސް ހުތުބާގައި ވަނީ ބުނެފަ އެވެ.

މުސްލިމުންނަށް ލިބިފައިވާ ކާމިޔާބީތަކުގެ ފަހަތުގައި ވެސް ވަނީ އެއްބައިވަންތަކަމާއި އެކުވެރިކަން ކަމަށާއި ނާކާމިޔާބީއާ ކުރިމަތިވީ ބައިބައިވުމުން ކަމަށް ހުތުބާގައި ކިޔައިދިނެވެ.

އީދު ހުތުބާގައި ބުނެފައި ވަނީ ހައްޖުގެ މަތިވެރި އަޅުކަމުން ހަނދާންކޮށްދެނީ ނަބީބޭކަލުންގެ ބަފައިކަލުން އިބްރާހިމްގެފާނުގެ ވާހަކަތައް ކަމަށެވެ. އަދި އިބްރާހިމްގެފާނާއި އެކަލޭގެފާނުގެ ދަރިކަލުން އިސްމާއިލްގެފާނު ގެފުޅުގެ ބިންގަލުގެ މަތީގައި ގެފުޅު އަލުން ބިނާކުރެއްވި ޒިކުރާ ވެސް ހައްޖުގެ މަތިވެރި އަޅުކަމުން ހަނދާންކޮށްދޭ ކަމަށް ވެސް އީދު ހުތުބާގައި ބުނެފައިވެ އެވެ.

ހުތުބާގައި ބުނެފައި ވަނީ އިސްމާއީލްގެފާނު ދެއްކެވި ކިޔަމަންތެރިކަމުގެ ނަމޫނާއަކީ އަދުގެ ޒުވާނުންނަށް ލިބިގެންވާ ހެޔޮ ނަމޫނާއެއް ކަމަށެވެ. އިސްމާއިލްގެފާނު ދެއްކެވި ނަމޫނާއަކީ މައިންބަފައިންނަށް ކިޔަމަން ގަންނަން ޖެހޭ މިންވަރުގެ ދިރިހުރި މިސާލެއް ކަމަށް ވެސް ހުތުބާގައި ބުނެފައިވެ އެވެ.

ހުތުބާ ނިންމަވާލައްވަމުން ވަނީ މާތް ﷲ އަށް ތަގްވާވެރިވުމަށް ގޮވާލައްވާފަ އެވެ. އަދި އިސްލާމް ދީނުގެ އަގީދާގައި ވަރުގަދައަށް ހިފަހައްޓައި ދީނުގެ ވާޖިބުތަކާއި ފަރުޞުތަކަށް ރައްކާތެރިވެ ފުރިހަމައަށް އަދާކުރުމަށް ނަސޭހަތްތެރިވެފަ އެވެ.

މާލެ އާއި އަތޮޅުތަކުގެ އެކި ރަށްރަށުގައި ބޮޑު ޖަމާއަތުގައި ކުރި އީދު ނަމާދަށް ގިނަ ބަޔަކު ވަނީ ހާޒިރުވެފަ އެވެ.