ބެންކޮކް (06 އޮކްޓޯބަރު) ހަތިޔާރު އަަޅައިގެން ހުރި މީހަކު ތައިލެންޑުގެ ކުޑަ ކުދިން ބަލަހައްޓާ ސެންޓަރަކަށް ވަދެ 30 އަށްވުރެ ގިނަ މީހުން މަރާލައިފި އެވެ.

އެ ގައުމުގެ ފުލުސް އޮފީހުގައި މީގެ ކުރިން ވަޒީފާ އަދާކޮށްފައިވާ އެ މީހާ ވަނީ އެ ސެންޓަރަށް ވަދެ 22 ކުޑަކުދިންގެ އިތުރުން އެތަނުގެ މުވައްޒަފުންތަކެއް ވެސް މަރާލައިފަ އެވެ.

ހަބަރުތައް ބުނާ ގޮތުގައި އެ މީހާ ވަނީ ހަމަލާ ދިނުމަށް ފަހު އަމިއްލައަށް މަރުވެފަ އެވެ.

މި ހާދިސާއާ ގުޅިގެން ތައިލެންޑު ސަރުކާރުގެ ތަރުޖަމާނަކު ވިދާޅުވީ މި ހާދިސާގެ ތަހުގީގު ފަށާފައިވާ ކަމަށާއި ކުރިއަށް އޮތް ތަނުގައި މިފަދަ ކަންކަން ހުއްޓުވުމަށް މަސައްކަތް ކުރާނެ ކަމަށެވެ.

ތައިލެންޑަކީ އަމިއްލަ ހަތިޔާރު ގެންގުޅުން ގިނަ ގައުމެއްގެ ގޮތުގައި ފާހަގަ ކުރެވުނު ނަަމަވެސް ނިސްބަތުން މިފަަދަ ހާދިސާތައް މަދު ގައުމެކެވެ.

މީގެ ދެ އަހަރު ކުރިން 2020 ވަނަ އަހަރު އަމިއްލަ މުދާ ބެހުމުގެ މައްސަލައެއްގައި މީހަކު ވަނީ 29 މީހުން މަރާލައި އިތުރު 56 މީހުން ޒަހަމް ކޮށްލައިފަ އެވެ. -- އަލް އަރަބިއްޔާ