މ. ދިއްގަރު ބަނދަރުގައި އޮތް ލޯންޗެއް މިއަދު ގޮވައި އެ ވަގުތު ލޯންޗުގައި ތިބި ދެ މީހުންގެ ތެރެއިން އެކަކަށް ސީރިއަސް އަނިޔާތަކެއް ލިބިއްޖެ އެވެ.

މި ހާދިސާ ހިނގީ މިއަދު ހެނދުނު 9:50 ހާއިރު އެވެ. އަދި އަލިފާން ރޯވެ ގޮވީއެ ރަށު "އަސުރުމާ" ނަމަކަށް ކިޔާ ލޯންޗެއްގަ އެވެ.

ދިއްގަރު ކައުންސިލުގެ ރައީސް އަހްމަދު ނިޝާން ވިދާޅުވީ ހާދިސާ ހިނގިއިރު ލޯންޗުގައި ތިބީ ދެ މީހުން ކަމަށެވެ އަދި ލޯންޗު ގޮވީ މަސް ބާނަން ދާން ވެގެން ސްޓާޓްކޮށްލި ވަގުތުގައި ކަމަށް އޭނާ ވިދާޅުވި އެވެ.

"ބޮޑަށް ބެލެވެނީ ކަރަންޓު ޝޯޓެއް ވެގެން ކަމަށް،" ނިޝާން ލަފާކުރެއްވި އެވެ.

ނިޝާން ވިދާޅުވީ ވިދާޅުވީ އަނިޔާ ލިބިފައިވާ ދެ މީހުންގެ ހަށިގަނޑު ވަރަށް ބޮޑަށް ފިހިފައިވާ ކަމަށާއި އިތުރު ފަރުވާއަށް އެ ދެ މީހުން ވެސް މާލެ ގެނެސްފައިވާ ކަމަށެވެ.

"އެ ދެ މީހުން ތިބީ ވަރަށް ބޮޑަށް ފިހިފައި. އެވަގުތު އެމަޖެންސީގައި ހޮސްޕިޓަލަށް އެ މީހުން ގެންދިޔަ. އަދި މިހާރު ވަނީ އިތުރު ފަރުވާއަށް މާލެ ފޮނުވާލާފައި،" ކައުންސިލްގެ ރައީސް ވިދާޅުވި އެވެ.

ލޯންޗު މޫދަށް ތިރިކޮށް އަލިފާންގަނޑު ނިއްވާލުމަށްފަހު މިހާރު ވަނީ އެއްގަމަށް އަރުވައިފަ އެވެ. އަދި ލޯންޗުގެ ބޮޑު ބައި އަނދާފައިވީ ނަމަވެސް، އިންޖީނުގައި ރޯ ނުވާ ކަމަށް ނިޝާން ވިދާޅުވި އެވެ.