ގާޒާ (12 މެއި) - އިޒުރޭލުން ފަލަސްތީނުގެ ގާޒާއަށް ބޮން އަޅައި މުޖާހިދުންގެ އިސް ދެކޮމާންޑަރަކު ޝަހީދު ކޮށްލައިފި އެވެ.

ގާޒާގެ ހަނގުރާމަވެރިންނަށް އަމާޒުކޮށްދޭ ހަމަލާތަކެއް ކަމަށް ބުނެ އިޒުރޭލުން ހިންގަމުން ގެންދާ ބޮންއެޅުމުގެ މި ހަމަލާތަކުގައި މިހާތަނަށް ވަނީ 28 މީހުން މަރުވެފަ އެވެ. މީގެ ތެރޭގައި އަންހެނުންނާއި ކުޑަކުދިން ވެސް ހިމެނެ އެވެ.

އިޒުރޭލުގެ ހަމަލާތަކަށް ރައްދު ދިނުމުގެ ގޮތުން ގާޒާއިން އިޒުރޭލަށް ދެމުންގެންދާ ރޮކެޓް ހަމަލާތަކުގައި މިހާތަނަށް ވަނީ އިޒުރޭލުން އެކަކު މަރުވެފަ އެވެ. އިޒްރޭލުގެ ހަމަލާގައި އެންމެ ފަހުން ޝަހީދުކޮށްލި ދެ ކޮމާންޑަރުންނަކީ މުޖާހިދުންގެ ރޮކެޓް ފޯސްގެ ވެރިޔާ އަލީ ޣާލީ އާއި ހަތިޔާރު އެޅި ލަޝްކަރުގެ އިސްވެރިޔާ އަހުމަދު ދައްގާގެވެ.

މި ދެ މުޖާހިދީންގެ މަރާއެކު އިސްރާއީލުން މިފަހަރުގެ ހަމަލާގައި ޝަހީދުކޮށްލި ފަލަސްތީނުގެ ކޮމާންޑަރުންގެ އަދަދު ފަހަކަށް އެރީ އެވެ.

އިޒުރޭލުން ބުނާ ގޮތުގައި އިއްޔެގެ ހަމަލާގައި ޝަހީދު ކޮށްލެވުނު ދެ ކޮމާންޑަރުންނަކީ އަންގާރަ ދުވަހުން ފެށިގެން ގާޒާއިން އިޒުރޭލަށް ދެމުން ގެންދާ ރޮކެޓް ހަމަލާތައް ދިނުމުގައި އިސްވެ ހަރަކާތްތެރިވާ ދެ ކޮމާންޑަރުންނެވެ.

އިޒުރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވި ގޮތުގައި އިޒުރޭލުން ފަށާފައިވާ ހަމަލަތަކަކީ އެ ގައުމަށް އޮތް ނުރައްކާ ހުއްޓުވަން ދެމުން ގެންދާ ހަމަލަތަކެކެވެ.

"އަހަރެމެންގެ މީހަކަށް ގެއްލުމެއް ދޭ ކޮންމެ މީހެއްގެ ލޭ އޮހޮރުވައިލެވޭނެ،" ވީޑިއޯ މެސެޖެއްގައި އިޒުރޭލުގެ ބޮޑުވަޒީރު ވިދާޅުވި އެވެ.