ކަސްޓަމަރެއް ދިން އޯޑަރަކަށް ޖަވާބުގައި "ތަމްބްސް އަޕް" އިމޯޖީއެއް ފޮނުވުމަށްފަހު މުދާ ނުފޮނުވުމުން ކެނެޑާގެ ދަނޑުވެރިޔަކު ބޮޑު އަދަދަކުން ޖޫރިމަނާ ކޮށްފި އެވެ.

މި މައްސަލަ ބެލި އެގައުމުގެ ކޯޓަކުން ބުނެފައިވަނީ "ލައިކް" އިމޯޖީއަކީ ޑިޖިޓަލް ސޮއެއްގެ ގޮތުގައި ބަލައިގަނެވޭނެ ކަމަށާއި އެހެން ކަމުން އެ އިމޯޖީ ފޮނުވުމުން އޯޑަރު ބަލައިގަނެވުނީ ކަމަށެވެ.

އެހެން ނަމަވެސް އެ އޯޑަރަށް ދަނޑުވެރިޔާ މުދާ ނުފޮނުވުމުން ކަސްޓަމަރު ވަނީ ދަނޑުވެރިޔާއާ ދެކޮޅަށް ކޯޓަށް މައްސަލަ ހުށައަޅާފަ އެވެ.

ހުކުމް އިއްވަމުން މައްސަލަ ބެލި ފަނޑިޔާރު ވަނީ ބަލައިގަތް އޯޑަރަށް މުދާ ފޯރުކޮށް ނުދިނުމުގެ ކުށުގައި 61،461 އެމެރިކާ ޑޮލަރުން ދަނޑުވެރިޔާ ޖޫރިމަނާ ކޮށްފަ އެވެ.

މިއީ މިފަދަ ގޮތަކަށް ޑިޖިޓަލް އިމޯޖީއެއް ސޮއެއްގެ ގޮތުގައި ބަލައިގަންނަށް ކޯޓަކުން ހުކުމްކުރި ފުރަތަމަ ފަހަރެވެ. މިއީ ތަރައްގީ ވަމުން އަންނަ ދުނިޔޭގައި ސޯޝަލް މީޑިއާ ބޭނުން ކުރުމުގައި ސަމާލުވާންވީ ކަމެއް ކަމަށް ފަނޑިޔާރު ބުނެފައިވެ އެވެ.

މި ނިންމުމާއެކު ގިނަ ބަޔަކު އަންނަނީ މައްސަލައިގެ ހުކުމަށް ޖޯކު ޖަހަމުންނެވެ. އެގޮތުން ދެން ލައިކެއް ދިނުމުގެ ކުރިން ހާސް ފަހަރު ވިސްނަން ޖެހޭނެ ކަމަށް މީހުން އަންނަނީ ބުނަމުންނެވެ.