ގާޒާގެ ހޮސްޕިޓަލަކަށް އަމާޒުކޮށް އިޒްރޭލުން ދިން ބޮމުގެ ހަމަލާއެެއްގައި 500 އަށް ވުރެ ގިނަ މީހުން ޝަހީދުކޮށްލާފައިވާ ކަމަށް ގާޒާގެ ހެލްތު މިނިސްޓްރީން ބުނެފި އެވެ.

ގާޒާގެ ބެޕްޓިސްޓް ހޮސްޕިޓަލްގެ ގޯތިތެރެއަށް ދިން ހަމަލާގައި ޝަހީދުވި މީހުންގެ ތެރޭގައި ގިނައީ އަންހެނުންނާއި ކުޑަކުދިން ކަމަށް އަލްޖަޒީރާއިން ބުންޏެވެ.

މިމަހުގެ ހަތްވަނަ ދުވަހު އިޒްރޭލުގެ އެތެރެއަށް ހަމާސް ޖަމާއަތުން ދިން ހަމަލާގައި 1،400 އަށް ވުރެ ގިނަ މީހުން ޝަހީދުވި ފަހުން އިޒްރޭލުން ގާޒާއަށް ދިން ހަމަލާތަކުގައި ފަލަސްތީނުގެ 3،000 އެއްހާ މީހުން ވަނީ ޝަހީދުވެފަ އެވެ.

ހަމާސްގެ ލީޑަރު އިސްމާއިލް ހަނިއްޔާ ވިދާޅުވީ ގާޒާގެ ހޮސްޕިޓަލަށް އިޒްރޭލުން ދިން އުދުވާނީ ހަމަލާގެ ޒިންމާ އުފުލަން ޖެހޭނީ އެމެރިކާ އިން ކަމަށެވެ.

"ހޮސްޕިޓަލަށް ދިން ހަމަލާގެ ޒިންމާ އެމެރިކާ އަށް އުފުލަން ޖެހެނީ އިޒްރޭލުގެ ހަމަލާތަކަށް ހިތްވަރުދޭތީ،" ހަނިއްޔާ ވިދާޅުވި އެވެ.

ހަނިއްޔާ އިތުރަށް ވިދާޅުވީ މި ހަމަލާގެ ސަބަބުން އިޒްރޭލުގެ އަނިޔާވެރިކަމާއި އޮކްޓޯބަރު މަހުގެ 7 ވަނަ ދުވަހު ހަމާސް ޖަމާއަތުން ދިން ހަމަލާއަށް ފަހު އިޒްރޭލް "ބަލިވި މިންވަރު" ކަށަވަރުވެފައިވާ ކަމަށެވެ.

ގާޒާގެ ހޮސްޕިޓަލަށް މިރޭ ދިން ހަމަލާގައި ޒަހަމްވި މީހަކަށް ފަރުވާދޭން ގެންދަނީ.

ރާމަاللهގެ މަގުތަކަށް އެތައް ހާސް ބަޔަކު ނުކުތް ގޮތަށް، އިޒްރޭލުން ހިފާފައިވާ ހުޅަނގު އައްސޭރީގައި ތިބި ފަލަސްތީނު ރައްޔިތުން ވެސް އިޒްރޭލާ ދެކޮޅަށް ތެދުވުމަށް އޭނާ ގޮވާލެއްވި އެވެ.

އިޒްރޭލުގެ އަސްކަރިއްޔާގެ ތަރުޖަމާނު ޑެނިއަލް ހަގާރީ ވިދާޅުވީ ގާޒާގެ އެތެރެއިން ފޮނުވާލި ރޮކެޓްތަކެއް ހަމަލާ ދިން ވަގުތު އަލްއަހްލީ އަރަބް ހޮސްޕިޓަލްގެ "ކައިރިން ދިޔަ" ކަމަށެވެ.

ގާޒާގެ ހޮސްޕިޓަލަކަށް ދިން ހަމަލާއަށް ފަހު ޖޯޑަންގެ އައްމާނުގައި ހުންނަ އިޒްރޭލު އެމްބަސީގެ ގޯތިތެރެއަށް ވަދެ އެތަނުގައި އެތަނުގައި ވަނީ ހުޅުޖަހާފައި ކަމަށް އޭއެފްޕީން ބުންޏެވެ.

ރަހުމްކުޑަ މި ހަމަލާއާ ގުޅިގެން ރުޅިގަދަވި މުޒާހަރާގެ ބައިވެރިން ސަލާމަތީ ފާރުތައް ފޫއަޅުވާލައި އެމްބަސީއާ ދިމާލަށް ހިނގައިގަތް ނަމަވެސް ސަލާމަތީ ބާރުތަކުން ކަރުނަ ގޭސް ޖަހައި އެމީހުން ފަހަތަށް ޖައްސާލި ކަމަށް އޭއެފްޕީގެ ނޫސްވެރިޔާ ބުންޏެވެ.

އިޒްރޭލުން ގާޒާ އަށް ދެމުންދާ ހަމަލާތަކުގައި މިހާތަނަށް 1300 އަށް ވުރެ ގިނަ އިމާރާތް ބިމާ ހަމަކޮށްލިއިރު، މި ހަނގުރާމައިގެ ފުރަތަމަ ހަތް ދުވަހުގެ ތެރޭގައި މިލިއަނަކަށް ވުރެ ގިނަ މީހުން ގެދޮރު ގެއްލި ހާލުގައި ޖެހިފައިވާ ކަމަށްވެ އެވެ. އަދި ހަނގުރާމަތަކުގައި ބޭނުންކުރާ އެންމެ ބާރު ގަދަ ހަތިޔާރުތަކުން ގާޒާ ސުންނާފަތި ކުރަމުން ދާއިރު، އިޒްރޭލުން ވަނީ ގާޒާ އިން ފެނާއި ކަރަންޓު ވެސް ކަނޑާލައިފަ އެވެ.