މިދިޔަ ހަފްތާގެ ތެރޭގައި ދުނިޔޭގެ ހަބަރުތަކުގެ ފަލަ ސުރުހީއިން ޖާގަ ހޯދި އެއް ހަބަރަކީ އިންޑިއާގެ މަހުޖަނު އާއިލާގެ ތެރޭގައި އޮތް ކައިވެނީގެ ހަފްލާތަކެއްގެ ހަބަރެވެ.

މަހުޖަނު މުކޭޝް އަމްބާނީއާއި އޭނާގެ އަންހެނުން ނީތާ އަމްބާނީގެ އެންމެ ހަގު ދަރިފުޅު އަނަންތު އަމްބާނީއާއި އިންޑިއާގެ ވިޔަފާރި އާއިލާއަކަށް ނިސްބަތްވާ ރަދިކާ މާޗަންތުގެ ކައިވެންޏަކީ މިއަހަރު އިންޑިއާގައި ކުރިއަށްދާނެ އެންމެ ބޮޑު އިވެންޓެކެވެ.

އެ ކައިވެނީގެ ޕްރީ ވެޑިން ހަފްލާތައް މިމަހުގެ 1 ން 3 އަށް ކުރިއަށް ދިޔައިރު އެ ހަފްލާގެ ވާހަކަތައް މުޅި ސޯޝަލް މީޑިއާގައި މިހާރު ދަނީ ދައުރުވަމުންނެވެ.

އެ ހަފްލާއަށް ދުނިޔޭގެ އެކި ކަންކޮޅުތަކުން މެހެމާނުން ގެނެވުނުއިރު މިއީ އެތައް ހާސް ޑޮލަރެއް ހޭދަވާނެ ކަމެއްކަން ޔަގީނެވެ. ހަފްލާއަށް އައި ތަރިންގެ ތެރޭގައި މާކް ޒަކަބާގް، ބިލް ގޭޓްސް، އިވަންކާ ޓްރަމްޕް، އޭކޮން އަދި ރިއާނާ ހިމެނެ އެވެ. އޭގެ އިތުރުން ވެސް ބޮލީވުޑްގެ ގިނަ ތަރިންތަކެއް ވެސް ފެނުނެވެ.

ހަބަރުތައް ބުނާ ގޮތުގައި ތިން ދުވަހަށް ދެމިގެން ދިޔަ އެ ހަފްލާތަކަށް އެކަނި ވެސް އަމްބާނީ އާއިލާއިން 1000 ކްރޯޑް ރުޕީސް ހޭދަކުރި އެވެ. އެއީ އެ އާއިލާގެ މިލްކިއްޔާތުގެ 0.01 ޕަސެންޓެވެ.

ފާހަގަކޮށްލަން ޖެހޭ ކަމަކީ މިއީ އަދި އަސްލު ކައިވެނި ނޫން ކަމެވެ. އެއީ ކައިވެނީގެ ކުރިން ބޭއްވި ޕްރީ ވެޑިން ސެލެބްރޭޝަން އެކެވެ. އެހެން ކަމުން ޖުލައި މަހު ބާއްވަން ހަމަޖެހިފައިވާ އަސްލު ކައިވެންޏަށް އެއާއިލާއިން ހޭދަކުރާނެ ވަރު އަންދާޒާ ކުރަން ވެސް ދައްޗެވެ.

ކޮންމެއަކަސް އަމްބާނީ އާއިލާއަކީ ފައިސާގެ ދަޅަ ދުނިޔެއަށް ދައްކަން މޮޅު އާއިލާއެއްކަން މިދިޔަ ހަފްލާތަކުން އެނގިއްޖެ އެވެ. އަތުގައި ފައިސާ ހުރީތީ ފައިސާއިން ފެންވަރަން ވެސް އެމީހުން ހޭވައްލާ ތައްޔާރެވެ. ލާރި ހުއްޓަސް އެއީ ބޮޑުވަރެވެ.