ރެޓިނޯލްއަކީ ވަރަށް ގިނަ މީހުން މިހާރު ސްކިން ކެއާ ރޫޓިންގައި ބޭނުންކުރާ އެއްޗެކެވެ. ރެޓިނޯލް ބޭނުންކުރަން ފަށަން ބޭނުން ނަމަ ފެށުމުގެ ކުރިން މި ލިޔުން ކިޔާލާށެވެ.

ރެޓީނޯލް އަކީ ވިޓަމިން އޭ ގެ ވައްތަރެކެވެ. ކްރީމް އަދި ސިރަމް ގޮތުގައި ވެސް ރެޓިނޯލް ލިބޭން ހުންނާނެ އެވެ. އަދި މެޑިކަލް ގްރޭޑް ރެޓިނޯލް ވެސް ފާމަސީތަކުން ލިބެން ހުންނާނެ އެވެ.

ރެޓިނޯލް ގިނަ މީހުން ބޭނުންކުރުމުން ސްކިން ޓާންއޮވާ އަވަސްވެ އެވެ. ބިހި ނަގާ މީހެއް ނަމަ މި ބޭނުންކުރުމުން އަަވަހަށް ބިހިތައް ފިލުވާލެވެ އެވެ. ރެޓިނޯލްއަކީ ހަންގަނޑުގެ ކޮލާޖަން އިތުރުކޮށްދޭ އެއްޗެކެވެ. މީގެ ސަބަބުން ހަންގަނޑުގެ ކުލަ އެއްވަރުކޮށްދީ، ރީތިކޮށްދީ ލައްތައް ފިލުވާލަ އެވެ.

ރެޓިނޯލް ބޭނުންކުރަން ފަށާއިރު ފުރަތަމަ ބޭނުންކުރާނީ ހަފްތާއަކު އެއްފަހަރު އެވެ. އެއަށް ފަހު މަޑުމަޑުން ބޭނުންކުރާވަރު ހަފްތާއަކުން އިތުރު ކުރާށެވެ. އެންމެ ގިނަ ވެގެން ބޭނުން ކުރާނީ ހަފްތާއަކު ތިން ފަހަރު އެވެ. ބޭނުންކުރާނީ ރޭގަނޑު އެކަންޏެވެ. މިއީ ދުވާލުގެ ވަގުތު ބޭނުންކުރެވޭ އެއްޗެއް ނޫނެވެ. ރެޓިނޯލް ބޭނުންކުރާ ނަމަ ބަރާބަރަށް މޮއިސްޗަރައިޒާ އަދި ސަންސްކްރީން ބޭނުންކުރަން ވާނެ އެވެ.

ރެޓިނޯލް އަކީ ބާރުގަދަ އެއްޗެއް ކަމުން އެ ބޭނުންކުރަންވާނީ ވަރަށް ބަލައިގެންނެވެ. އެގްޒީމާ ކަހަލަ އެއްވެސް ސްކިން މައްސަލައެއް ހުންނަ ނަމަ ބޭނުން ނުކުރާށެވެ. އަދި ރެޓިނޯލްއަކީ މާބަނޑު މީހުން ބޭނުންކުރަން ރައްކާތެރި އެއްޗެއް ނޫނެވެ.