މި އަހަރުގެ އަޟްހާ އީދު ގައުމީ ފެންވަރުގައި ފާހަގަ ކުރާނެ ތިން ރަށެއް ދިވެހި ބަހާއި ތާރީހާއި ސަގާފަތާ ބެހޭ މިނިސްޓްރީން ކަނޑައަޅައި އެ ރަށްތައް އިއުލާންކޮށްފި އެވެ.

ގައުމީ ފެންވަރުގައި އީދު ފާހަގަކުރުމަށް މިނިސްޓްރީން ނިންމާފައިވަނީ ރ. އުނގޫފާރާއި ދ. ކުޑަހުވަދޫގެ އިތުރުން ގއ. ވިލިނގިލީގަ އެވެ.

އަޟްހާ އީދު ފާހަގަ ކުރުމަށް ޝައުގުވެރިވާ ރަށް ރަށުން އެކަމަށް އެދި ޕްރޮޕޯސަލް ހުށަހެޅުމުގެ ފުރުސަތު ހުޅުވާލީ މިދިޔަ މަހުގެ 25 ގަ އެވެ. އެ ފުރުސަތު ހަމަވިއިރު 26 ރަށަކުން ޕްރޮޕޯސަލް ހުށަހެޅި އިރު، އެއީ ރާއްޖޭގެ އުތުރުން ހަތް ރަށަކާއި، މެދުރާއްޖެތެރެއިން 10 ރަށަކާއި، ރާއްޖޭގެ ދެކުނުން 9 ރަށެކެވެ.

މިނިސްޓްރީން ނިންމާފައި އޮތީ އުތުރުން، މެދުރާއްޖެތެރެއިން އަދި ދެކުނުން ކޮންމެވެސް އެއް ރަށެއް ކަނޑައަޅާށެވެ.

މިނިސްޓްރީ ބުނީ ރަށްތައް ކަނޑައެޅުމުގައި ބެލި ކަންތައްތަކުގެ ތެރޭގައި، އީދުގައި އެ ރަށަކުން ކުޅޭނެ ކުޅިވަރުތަކަށާއި ކުރާނެ ހަރަދުތަކާއި އަގެއް ނުނަގައި އެ ރަށަކުން ކޮށްދޭނެ ކަންތައްތައް ހިމެނޭ ކަމަށެވެ.

އަޟްޙާ އީދު ފާހަގަ ކުރުމަށް ޝައުގުވެރިކަން ފާޅުކޮށް ހުށަހަޅާފައިވާ ޕްރޮޕޯސަލްތައް ބަލައި މާކްސް ދިނުމަށް ހާއްސަ ކޮމެޓީއެއް އެކުލަވާލި އެވެ.

މި އަހަރުގެ ބޮޑު އީދު ދުވަހަކީ ޖޫން 17 އެވެ. ހައްޖު ދުވަހާއި އީދު ދުވަހާ އެކު، ޖޫން 16 އިން ފެށިގެން ޖޫން 22 އާ ހަމައަށް ސަރުކާރު ބަންދު ކުރުމަށް ވަނީ ހަމަޖައްސައިފަ އެވެ.