މިދިޔަ 19 ވަނަ ރައްޔިތުންގެ މަޖިލިހުގެ އަޣުލަބިއްޔަތު އޮތް އެމްޑީޕީން ރުހުން ނުދޭން ނިންމި ތިން ވަޒީރަކަށް ރުހުން ދިނުމަށް ޕީއެންސީގެ ސުޕަ މެޖޯރިޓީ އޮންނަ މަޖިލިހުން މިއަދު ފާސްކޮށްފި އެވެ.

ރައީސް ޑރ. މުހައްމަދު މުއިއްޒުގެ ފުރަތަމަ ކެބިނެޓަށް އައްޔަން ކުރެއްވި 22 ވަޒީރުންގެ ތެރެއިން އެމްޑީޕީން ވިޕެއް ނެރުނީ ހަތަރު މިނިސްޓަރަކަށް ރުހުން ނުދިނުމަށެވެ. އެއީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި އެޓާނީ ޖެނަރަލް އަހުމަދު އުޝާމް އަދި ހައުސިން މިނިސްޓަރު ޑރ. އަލީ ހައިދަރާއި އިކޮނޮމިކް މިނިސްޓަރު މުހައްމަދު ސައީދަށެވެ.

މަޖިލިހުގައި އޭރުގައި ނެގި ވޯޓުގައި ޝަހީމާއި އުޝާމް އަދި ހައިދަރަށް ރުހުން ދޭން ފާހެއް ނުވި އެވެ. އެކަމަކު ސައީދަށް ރުހުން ލިބުނެވެ.

އެކަމަކު، 20 ވަނަ މަޖިލިހުގެ މިއަދުގެ ޖަލްސާގައި ވަނީ ރުހުން ނުލިބުނު ތިން ވަޒީރުންނަށް ރުހުން ދީފަ އެވެ.

އުޝާމަށް ރުހުން ލިބުނީ ވޯޓުގައި ބައިވެރިވެވަޑައިގެންނެވި 87 މެމްބަރުންގެ އިއްތިފާގުންނެވެ. ޝަހީމަށް ރުހުން ލިބުނީ ވޯޓުގައި ބައިވެރިވެވަޑައިގެންނެވި 83 މެމްބަރުންގެ އިއްތިފާގުންނެވެ. އަދި ހައިދަރަށް ރުހުން ލިބުނީ ވޯޓުގައި ބައިވެރިވެވަޑައިގެންނެވި 81 މެމްބަރުންގެ އަޣުލަބިއްޔަތުންނެވެ. ހައިދަރުގެ ނަން ފާސް ކުރަން ނުފެންނަ ކަމަށް ހަތަރު މެމްބަރަކު ވޯޓު ދެއްވި އެވެ.

ރައީސް ޑރ. މުހައްމަދު މުއިއްޒު ވަނީ ރުހުން ލިބިވަޑައިނުގެން ތިން ވަޒީރުން އެ ބޭފުޅުން ތިއްބެވި މަގާމުތަކަށް އަލުން އައްޔަން ކުރައްވައި މަގާމުގެ ފަތްކޮޅު ދެއްވައިފަ އެވެ.