ފަލަސްތީނުގެ ރައްޔިތުންނަށް އެހީތެރިވުމުގެ ގޮތުން މިއަދު ކުރިއަށް ގެންދާ "ފަލަސްތީނާއެކު ދިވެހީން" ޓެލެތޯނުގައި ދިވެހިރާއްޖޭގެ ގައުމީ ދިފާއީ ބާރުން ފައިސާގެ އެހީ ހަދިޔާކޮށްފި އެވެ.

މިއަދުގެ 08:00 އިން މެންދަމު 00:00 އަށް ކުރިއަށް ގެންދާ މި ޓެލެތޯނުގައި، ދިވެހިރާއްޖޭގެ ގައުމީ ދިފާއީ ބާރުން ވަނީ ޖުމްލަ 2,169,826.32 ރުފިޔާ، ފަލަސްތީނު ފަންޑަށް ހަދިޔާ ކޮށްފަ އެވެ.

ސިފައިންގެ ފަރާތުން ހަދިޔާކުރި މި ފައިސާގެ އެހީ އެ ފަންޑަށް ހަވާލުކޮށްދެއްވީ، ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ހިލްމީ އެވެ. ޗީފް އޮފް ޑިފެންސް ފޯސްގެ އަރިހުގައި ޑިފެންސް މިނިސްޓަރު މުހައްމަދު ޣައްސާން މައުމޫނާއި ވައިސް ޗީފް އޮފް ޑިފެންސް ފޯސް ބްރިގޭޑިއާ ޖެނެރަލް އަހްމަދު އިޔާޒް މި ފައިސާ ހަދިޔާކުރުމުގެ އިވެންޓްގައި ބައިވެރިވެ ވަޑައިގެންނެވި އެވެ.

މި ޓެލެތޯންއަށް ބޮޑު ތަރުހީބެއް ލިބެމުން އަންނައިރު ސަރުކާރު ހިއްސާވާ ކުންފުނިތަކާއި އިދާރާއަކުން އަންނަނީ އެހީތެރިކަން ފޯރުކޮށްދެމުންނެވެ. މީގެ އިތުރުން އަމިއްލަ ފަރުންދާއި ކުންފުނިތަކުންވެސް މިފަންޑަށް އަންނީ އެހީތެރިކަން ފޯރުކޮށްދެމުންނެވެ.

ފަލަސްތީނަށް އެހީވުމަށް މާލޭގެ 13 ސަރަހައްދުގައި ފަންޑު ފޮށިތައް ބަހައްޓާފައިވާ އިރު، ފޮށިތައް ގުނަން ފަށާނީ މިއަދު އިރުއޮއްސި 18:00 ގަ އެވެ. އަދި ޓީވީއެމްގެ ގޯތިތެރޭގައި ބަހައްޓާފައި ހުރި ފަންޑު ފޮށި މިރޭ 22:00 އާ ހަމައަށް ހުޅުވާފައި ބަހައްޓަން ވަނީ ނިންމައިފަ އެވެ.

ފޮށިތައް ކައިރިއަށް ނުދެވޭ މީހުން ދިވެހި ފައިސާއިން ނަމަ 7730000655865 އެކައުންޓަށް އަދި ޑޮލަރުން ނަމަ 7730000655866 އެކައުންޓަށް ޖަމާކުރެވޭނެ އިންތިޒާމު ވަނީ ހަމަޖައްސާފަ އެވެ.