އެއް ގައުމަކުން އެއްލައްކަައަށް ވުރެ ގިނަ ބިދޭސީން ނުގެނެވޭ ގޮތަށް ވަޒީފާއާ ބެހޭ ގާނޫނުގައި ކަނއަޅާފައިވާ އުސޫލު އުވާލަން ރައްޔިތުންގެ މަޖިލީހަށް ހުށަހަަޅާނެ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.

ބަންގްލަދޭޝުން މީހުން ގެނައުން ސަރުކާރުން މިހާރު އޮތީ ވަގުތީ ގޮތުން ހުއްޓާލައިފަ އެވެ. އެއީ އެ މީހުންގެ ރެކޯޑް ބެލެހެއްޓުން ނިޒާމީ ގޮތެއްގައި ވަރުގަދަ ކުރުމަށް އަޅާ ފިޔަވަޅުތަކެއް ނިމެންދެނެވެ. މިނިސްޓަރު މިއަދު ވިދާޅުވި ގޮތުގައި ކުރިއަށް އޮތް ތިން ހަފުތާއެއްހާ ދުވަހުގެ ތެރޭގައި އެ ފިޔަވަޅުތަކުގެ މަސައްކަތް ނިމޭނެ އެވެ.

ރައްޔިތުންގެ މަޖިލީހުގެ ސަލާމަތީ ހިދުުމަތްތަކާ ބެހޭ ކޮމިޓީ (240 ކޮމިޓީ) ގެ މިއަދުގެ ބައްދަލުވުމުގައި ވާހަކަދައްކަވަމުން އިހުސާން ވިދާޅުވީ ރާއްޖެއަށް މި ވަގުތު މަސައްކަތު މީހުން ބޭނުންވާ މިންވަރާއި ކުރިއަށް އޮތް ތަނުގައި ބޭނުންވާނެ ކަަމަށް ލަފާކުރެވޭ އަދަދަށް ބަލާއިރު، އަވަށްޓެރި ބަންގްލަދޭޝުން މީހުން ގެނެވޭ އަދަދު އެއްލައްކައިގައި އޮތް އޮތުން އެއީ އުވައިލަން ޖެހޭ ކަމެއް ކަމަށެވެ. އެހެން ނަމަވެސް އެއީ އިތުރު ފިޔަވަޅުތަކެއް އަޅާފައި ނޫނީ ކޮށްގެން ވާނެ ކަމެއް ނޫން ކަން ގަބޫލުކުރައްވާ ވެސް އޭނާ ވިދާޅުވި އެވެ.

"ހަމަ އެއާ އެކު [ބަންގްލަދޭޝުން މަސައްކަތުމީހުން ގެނައުމުގެ ފުރުސަތު] ހުޅުވައިލުމާ އެކު މިދަންނަވާ އެއް ލައްކަ މީހުންގެ ލިމިޓް ހަމަވާނެ. އެހެންވެއްޖެއްޔާ ދެން އޮންނާނީ، އަޅުގަނޑުމެން މަޖިލީހަށް ރިކޮމެންޑްކުރާނަން އެ ލިމިޓް ނަގަައިދޭށޭ. އެކަމަކު އެ ނަގައިދޭނީ މިދަންނަވާ ސޭފްގާޑްތައް އަޅުގަނޑުމެން އަޅައި ނިމުނީމާ،" މިނިސްޓަރު ވިދާޅުވި އެވެ.

އިހުސާން ވިދާޅުވީ ބަންގްލަދޭޝުން އެއްލައްކައަށް ވުރެ ގިނަ މަސައްކަތުމީހުން ނުގެނެވޭ ގޮތަށް ބާއްވައިގެން، "ރާއްޖޭގައި މިވަގުތު އޮތް ލޭބާ ޑިމާންޑަށް ކޭޓާކުރެވޭނެ ކަމަށް ގަބޫލުނުކުރާ" ކަމަށެވެ.

ބަންގްލަދޭޝުން އެއްލައްކައަށް ވުރެ ގިނަ މަސައްކަތު މީހުން ގެނައުމުގެ ކުރިން ސަރުކާރުން މައިގަނޑު ދެ ފިޔަވަޅެއް އަޅާނެ ކަމަށް އޭނާ ވިދާޅުވި އެވެ. ފުރަތަަމަ ކަމެއްގެ ގޮތުގައި ވިދާޅުވީ ބިދޭސީންގެ ރެކޯޑް ބަލަހައްޓާ ގޮތަށް ގެންނަ ބަދަލެކެެވެ. އެއީ "ހަންޑްރެޑް ޕަސެންޓް ބަޔޯމެޓްރިކަލީ އެކައުންޓަބަލް ސިސްޓަމަކަށް" ބަދަލުކުރައްވާނެ ކަމަށް އިހުސާން ވިދާޅުވި އެވެ.

ދެވަނަ ކަމަކީ ބިދޭސީ މަސައްކަތު މީހުން ރަށްރަށަށް ދާ އިރު އެ ރަށްރަށުގެ ކައުންސިލްތަކުން ވެސް އެ މީހުންގެ ރެކޯޑް ބެލެހެއްޓޭނެ އިންތިޒާމު ހަމަޖެއްސުމެވެ. އެގޮތުން މަރުކަޒީ ގޮތުން ސަރުކާރުން ދޭ ވޯކްޕާމިޓް އޮންނަ މީހާ ރަށެއްގައި މަސައްކަތް ކުރާ ނަމަ، އެ ރަށެއްގެ ކައުންސިލުން ވެސް ވޯކްޕާމިޓް އެންޑޯޒް ކުރަން ޖެހޭނެ ކަމަށް އޭނާ ވިދާޅުވި އެވެ.

އިހުސާން ވިދާޅުވީ ގޮތުގައި ސައްހަ ލިޔެކިއުން ނެތި ބިދޭސީން ރާއްޖޭގައި އުޅޭ މައްސަލައަށް އޭރުން ދާއިމީ ހައްލެއް ލިބޭނެ އެވެ.