ރ. އުނގޫފާރުގައި ކުޑަކުދިންތަކެއް ކަރަންޓުގައި ޖެހި، އެ ކުދިން ސަލާމަތްކުރަން އުޅުނު ޒުވާނާ މަރުވި ހާދިސާއާ ގުޅިގެން ފެނަކަ ކޯޕަރޭޝަން 50،000 ރުފިޔާއިން ޖޫރިމަނާ ކުރަން މޯލްޑިވްސް ޔުޓިލިޓީ ރެގިއުލޭޓަރީ އޮތޯރިޓީން މިއަދު ނިންމައިފި އެވެ.

މެއި މަހު މި ހާދިސާ ހިނގީ އުނގޫފާރު މަގުމަތީގައި ހުރި ހޮޅިދަނޑިއަކުން ފެންގަނޑަށް ކަރަންޓު އައިސްފައި ވަނިކޮށް ކުޑަކުއްޖަކު ކަރަންޓުގައި ޖެހުމުންނެވެ. އެ ކުއްޖާ ސަލާމަތް ކުރަން މަސައްކަތް ކުރި 18 އަހަރުގެ ޒުވާނަކު ވަނީ އެ ހާދިސާގައި މަރުވެފަ އެވެ.

އެ ހާދިސާއާ ގުޅިގެން މިއަދު ޔުޓިލިޓީ ރެގިއުލޭޓަރީ އޮތޯރިޓީން ނެރުނު ބަޔާނެއްގައި ބުނީ މި ހާދިސާ ހިނގި ގޮތް ބެލިއިރު، ހާދިސާ ހިނގަން މެދުވެރިވީ މަގު ބައްތިތަކުގައި ހުންނަންޖެހޭ ސަލާމަތީ އިކުއިޕްމަންޓްތަކުގެ ތެރޭގައި ހިމެނޭ އާތު ލީކް ސާކިޓް ބްރޭކަރާއި މިނިއޭޗާ ސާކިޓް ބްރޭކަރު ހަރުކޮށްފައި ނުވާތީކަން އެނގުނު ކަމަށެވެ. އަދި ފެނަކައިން ހިދުމަތް ދެމުން އަންނަ ގިނަ ރަށްތަކުގައި މަގުބައްތިތައް ދިއްލަމުން ދަނީ އާތު ލީކް ސާކިޓް ބްރޭކަރު ހަރުނުކޮށް ކަން ތަހުގީގަށް އެނގިފައިވާ ކަމަށް ވެސް އެ އޮތޯރިޓީން ބުނެ އެވެ.

މި ހާދިސާ ހިނގީ މަގުބައްތި ތަކުގެ ސަލާމަތީ ކަންކަމާމެދު ފެނަކައިން އިހުމާލުވެފައި ވާތީ އެވެ. އެހެންކަމުން އެ ކުންފުނި ޖޫރިމަނާ ކޮށްފައިވާ ކަމަށް އެ ބަޔާނުގައި ވެ އެވެ. 50،000 ރުފިޔާގެ ޖޫރިމަނާ ސަރުކާރު ބަންދު ނޫން 30 ދުވަހުގެ ތެރޭގައި ދެއްކުމަށް އެ ކުންފުންޏަށް ވަނީ އަންގައިފަ އެވެ.

މިފަދަ އިތުރު ހާދިސާތަކެއް ހިނގިޔަ ނުދިނުމަށް ފެނަކައިން ހިދުމަތް ދޭ ރަށްރަށުގައި ސަލާމަތީ ބްރޭކަރުތައް 30 ދުވަހުގެ ތެރޭގައި ހަރުކުރުމަށް ވެސް ވަނީ އަންގައިފަ އެވެ. އަދި މި މުއްދަތުގައި ހަރުނުކުރެއްވިނަމަ، އެ ހިދުމަތް މެދުކަނޑާލުމަށް ވެސް އެ އޮތޯރިޓީން ވަނީ އަންގައިފަ އެވެ.

އެ ހާދިސާއާ ގުޅިގެން ފެނަކައިން މަގު ބައްތި ތަކުގެ ސަލާމަތީ ކަންތައްތައް ހުރިގޮތް ބެލުމުމަށް ކުރިއަށް ގެންދިޔަ އިންސްޕެކްޝަނުން ގިނަ ރަށްތަކުގައި އީއެލްސީބީ މެދުވެރިނުކޮށް މަގުބައްތިތަކަށް ކަރަންޓް ދީފައިވާކަން ފާހަގަކުރެވިފައިވާކަމަށް އެ ކުންފުނިން ބުނެފައި ވެ އެވެ.