ކުރީގެ ރައީސް އިބްރާހިމް މުހައްމަދު ސޯލިހް އެމެރިކާއަށް ކުރެއްވި ދަތުރުފުޅުގެ ހަރަދުތަކުގެ ތަފްސީލުތައް ހިމެނޭ ރިސިޓްތައް ހާމަކުރަން ސަރުކާރުން ނިންމައިފި އެވެ.

އެ ރިސިޓްތައް ހާމަކުރުމާ ދެކޮޅަށް ދައުލަތުން ސުޕްރީމް ކޯޓަށް ހުށަހެޅި މައްސަލަ މިހާރު ވަނީ އަނބުރާ ގެންގޮސްފަ އެވެ.

ރައީސް ސޯލިހު އދ. ގައި ތަގްރީރު ކުރެއްވުމަށް 2022 ވަނަ އަހަރު އެމެރިކާއަށް ކުރެއްވި ދަތުރުފުޅުގެ ހަރަދުތައް ހާމަކުރަން އިންފޮމޭޝަން ކޮމިޝަނަރު އެންގި އެންގުމަށް އަމަލުކުރަންޖެހޭ ކަމަށް ހައިކޯޓުން ވަނީ މިދިޔަ އަހަރު ކަނޑައަޅާފަ އެވެ. ދައުލަތުން ވަނީ އެ މައްސަލަ އިސްތިއުނާފުކޮށްފަ އެވެ. ނަމަވެސް ފާޑުކިޔުންތައް އަމާޒުވުމުން އެ މައްސަލަ މިހާރު ވަނީ ނަގާފަ އެވެ.

ދައުލަތުން އިއްޔެ ކޯޓުގައި ބުނެފައި ވަނީ އެ ރިސިޓްތައް ނުދިނަސް އެ ދަތުރުގެ ހަރަދުތައް ކުރިން ވަނީ ހާމަކޮށްފައި ކަމަށެވެ.

އެ މައްސަލައިގައި ގިނަ ބައެއްގެ ފާޑުކިޔުންތަކެއް އަމާޒުވުމުން އެޓާނީ ޖެނެރަލް އޮފީހުން މިރޭ ނެރުނު ބަޔާނެއްގައި ވަނީ ދަލަތުން އެ މައްސަލާގައި ގެންގުޅޭ ސްޓޭންޑް ބަދަލުކުރަން ނިންމާފައިވާ ކަމަށެވެ. މައްސަލަ އަނބުރާ ގެނެސް ހައިކޯޓުން އެންގިގޮތަށް ރިސިޓްތައް ހާމަކުރާނެ ކަމަށް އެ ބަޔާނުގައިވެ އެވެ.

ދައުލަތުން މީގެކުރިން ބުނަމުން އައީ ރިސިޓްތަކަކީ މައުލޫމާތެއް ނޫން ކަމަށެވެ. މައުލޫމާތަކަށް ވާނީ ދަތުރުފުޅަށް ކުރި ހަރަދާ ގުޅޭގޮތުން ރިސިޓްގައި ހިމެނޭ ތަފްސީލުތައް އެކަނި ކަމަށް ކޯޓުގައި ދައުލަތުން ބުނެފައިވެ އެވެ.