ވޭތުވެދިޔަ 24 ގަޑިއިރު ހއ. ކެލައަށް ރެކޯޑް އަދަދަކަށް ވާރޭ ވެހިފައިވާ ކަމަށް މެޓް އޮފީހުން ބުނެފި އެވެ.

މެޓް އޮފީހުން ބުނީ ކެލާއަށް ވޭތުވެދިޔަ 24 ގަޑިއިރު ތެރޭގައި 231.5 މިލިމީޓަރުގެ ވާރޭ ވެހިފައިވާ ކަމަށެވެ. ދެވަނައަށް އެންމެ ގިނައިން ވާރޭ ވެހުނީ ހދ. ހަނިމާދޫ އަށެވެ. އެރަށަށް 177.5 މިލިމީޓަރުގެ ވާރޭ ވެހިފައިވާއިރު، ރ. އިފުރަށް 102 މިލިމީޓަރުގެ ވާރޭ ވެހިފައިވެ އެވެ.

އޭގެ އިތުރުން، ވިލާގަނޑުގައި އެންމެ ވައި ގަދަވެފައިވާކަމަށް ރެކޯޑު ކުރެވިފައި ވަނީ ވެސް އިއްޔެ އެވެ. އެއީ ގަޑިއަކު 46 މޭލަށް ފ. ނިލަންދޫ އޮޓޮމެޓިކް ވެދާ ސްޓޭޝަނުން ކަމަށް މެޓް އޮފީހުން ބުނެ އެވެ.

މެޓް އޮފީހުން ބުނީ ކުރިޔަށްއޮތް ފަސް ދުވަހުވެސް ރާއްޖޭގެ ބޮޑު ބަޔަކަށް ގުގުރުމާއެކު ވިއްސާރަކުރާނެ ކަމަށެވެ. މީގެ އިތުރުން އުތުރާއި މެދުރާއްޖެ ތެރޭގައި ގަޑިއަކު 17 މޭލާއި 27 މޭލާއި ދެމެދު ވައިގަދަވެ، އަދި ދެކުނުގައި ގަޑިއަކު 60 މޭލަށް ވައިގަދަވެގެން ދިޔުމުގެ ފުރުސަތު ބޮޑުކަމަށް މެޓް އޮފީހުން ބުނެ އެވެ.

އެހެންކަމުން ރާއްޖޭގެ ހުރިހާ ސަރަހައްދެއްގައި ވެސް ކަނޑުތައް ގަދަވެ، ވިލާގަނޑުގައި ވަރަށް ގަދަވާނެކަމަށް ލަފާކުރެވޭ ކަމަށާއި ދިޔަވަރު ބޮޑުވާ ގަޑީގައި އުދައިގެ އަސަރުކުރުން އެކަށީގެންވާ ކަމަށް މެޓް އޮފީހުން ވަނީ ބުނެފަ އެވެ.