އިސްލާމިކް މިނިސްޓަރު މުހައްމަދު ޝަހީމް އަލީ ސައީދުގެ ދަރިކަލުން މާހިލް ޝަހީމް އެމްބަސީގެ މަގާމަށް ވަޑައިގަތުމަށް ތަމްރީނު ހައްދަވައިފި އެވެ.

އަންގާރަ ދުވަހު ފޮރިން ސާވިސް އިންސްޓިޓިއުޓް އޮފް ދަ މޯލްޑިވްސް އިން ފޮރިން ސާވިސްއަށް އަލަށް ގުޅިވަޑައިގަންނަވާ ފަރާތްތަކަށް ހާއްސަކޮށް ކުރިއަށް ގެންދާ "ޕްރީ ޕޯސްޓިން ޕްރޮގްރާމް" ގައި މާހިލް ވަނީ ބައިވެރިވެވަޑައިގެންފަ އެވެ.

މިއީ ފޮރިން މިނިސްޓްރީން ޑިޕްލޮމެޓުންނަށް ދޭ ހާއްސަ ތަމްރީީނެކެވެ. މިއީ ސޯޝަލް މީޑިއާ ސްޓްރެޓެޖީތަކާއި ބައިނަލް އަގްވާމީ ގުޅުންތަކާއި އަދި މުހިންމު ނެޓްވޯކިން ޓެކްނިކްސްތައް ދަސްކޮށްދިނުމަށް ކުރިއަށް ގެންދިޔަ ޓްރޭނިންއެއް ކަމަށް އެ މިނިސްޓްރީން ބުނެ އެވެ.

މި ތަމްރީނު ޕްރޮގްރާމްގައި މާހިލް ބައިވެރިވެވަޑައިގެންފައި މިވަނީ މެލޭޝިޔާގައި ހުންނަ ރާއްޖޭގެ އެމްބަސީން ތާޑް ސެކްރެޓަރީގެ މަގާމު ދީފައިވާކަމުގެ އަޑުތައް ފެތުރިފައިވަނިކޮށެވެ. އެންމެ ފަހުން ރައީސް އެކުލަވާލެއްވި ޒުވާނުންގެ ގައުމީ ލަފާދޭ ކޮމިޓީއަށް ވެސް މާހިލް ވަނީ އައްޔަންކުރައްވާފަ އެވެ.

ޝަހީމްގެ އާއިލީ މެމްބަރުންނަށް ސަރުކާރުގެ މަގާމުތައް ދޭ ވާހަކަތަކާއެކު މީހުންގެ ފާޑުކިޔުންތައް އަމާޒުވުމުން ޝަހީމް އެކަން ދޮގު ނުކުރައްވާ ވިދާޅުވީ މަގާމުގެ ނާޖާއިޒު ފައިދާ ބޭނުންކޮށްގެން އާއިލާގެ އެއްވެސް މީހަކަށް ސަރުކާރުން ވަޒީފާ ހޯދައިދީފައި ނުވާނެ ކަމަށެވެ.