މަސްވެރިން މަހަށް ފުރުވަން ހިތްވަރު ދިނުމުގެ ގޮތުން، ކޮންމެ މަސްދޯންޏަކަށް ތިން ޓަނުގެ އައިސް ހިލޭ ދޭން ސަރުކާރުގެ މަސް ކުންފުނި، މިފްކޯ އިން ނިންމައިފި އެވެ.

މިފްކޯއިން ބުނީ މަސް ދޯނިތަކަށް ހިލޭ ތިން ޓަނުގެ އައިސް ދޫކުރަން ހަމަޖެހިފައި ވަނީ އެ ކުންފުނީގެ އައިސް ޕްލާންޓުތަކުގައި މިހާރު ހުރި ސްޓޮކް ހުސްވަންދެން ކަމަށެވެ.

"މަސްވެރިން މަހަށް ފުރުވުމަށް ހިތްވަރު ދިނުމުގެ ގޮތުން ސްޓޮކް ހުސްވަންދެން މާދަމާ، މިފްކޯގެ ހުރިހާ ސެންޓަރުތަކުންނާއި ތިނަދޫ އައިސް ޕްލާންޓުން ކޮންމެ ދޯންޏަކަށް 3 ޓަނު އައިސް ހިލޭ ދޫކުރުމަށް ވަނީ ނިންމައިފަ އެވެ،" މިފްކޯއިން ބުންޏެވެ.

މި އައިސް ދޫކުރަން ހަމަޖެހިފައި ވަނީ މާދަމާގެ ނިޔަލަށް ކަމަށް ވެސް މިފްކޯއިން ބުންޏެވެ.

ފާއިތުވި މަހެއްހާ ދުވަހު މަސްވެރިކަން ދަށްވުމަށްފަހު އަނެއްކާވެސް ވަނީ މަސްވެރިކަން ރަނގަޅުވާން ފަށައިފަ އެވެ.

މިފްކޯ އިން މިދިޔަ މަހު ވަނީ ރާއްޖޭގެ ދެކުނުގައި މަސް ގަންނަން އޮޕަރޭޓުކުރާ ހަތަރު ބޯޓެއް ޅ. ފެލިވަރުގެ ދަށަށް ބަދަލުކޮށްފަ އެވެ.

މީގެއިތުރުން ދެކުނުގެ މަސްވެރިންނަށް ފަސޭހަކޮށްދިނުމުގެ ގޮތުން ފެލިވަރުން އޮޕަރޭޓު ކުރަމުން އައި 100 ޓަނަށް ވުރެ ގިނަ މަސް ގަނޑުކުރެވޭ ބޯޓެއް ގއ. ކޫއްޑުއަށް ވަނީ ގެންގޮސްފަ އެވެ.