ރައްޔިތުންގެ މަޖިލީހުގެ މީދޫ ދާއިރާގެ މެމްބަރު، އަދި ވިޔަފާރިވެރިޔާ އަހުމަދު ސިޔާމް އާއި ބ. ކަމަދޫގައި މިފަހަރު ބޭއްވި އީދު ކުޅިވަރުތަކުން ވިދާލި ޒުވާނެއް ކަމަށްވާ އާމިނަތު ޒާރާގެ ކައިވެނީގެ ތައްޔާރީތައް ކުރަމުން ދާކަން އެނގިއްޖެ އެވެ.

"ހުރިހާ"އަށް އެނގިފައިވާ ގޮތުގައި މި ކައިވެނި ކުރުމަށް ހަމަޖެހިފައި ވަނީ އަންނަ އޮކްޓޯބަރު 10 ގަ އެވެ.

ފަރި ހަރަކާތްތަކުން ގިނަ ބައެއްގެ ހިތް އަތުލި ޒާރާ މި ހާއްސަ ކައިވަންޏަށް ދަނީ ވަރަށް ބޮޑަށް ތައްޔާރުވަމުންނެވެ. އެގޮތުން ޒާރާގެ އާއިލާ ވެސް މި ކައިވަންޏަށް ރުހި ގަބޫލުކަމަށްވެ އެވެ.

ޒާރާގެ ގާތް މީހަކު ބުނީ އެ އާއިލާއާ ރަށުގެ ގިނަ ބަޔަކު ތިބީ މި ކައިވެންޏާމެދު ވަރަށް ބޮޑަށް ހިތްހަމަޖެހިފަ އެވެ. އަދި ޒާރާ ކައިވެނީގެ ކުރިން މިހާރު ވަނީ ރަށު ކައުންސިލުގައި އޭނާ އަދާކުރަމުން އަންނަ ވަޒީފާއިން ވެސް ކެނޑެން ސިޓީ ލައިފަ އެވެ.

ދާދިފަހުން ސިޔާމް ވަނީ ޒާރާގެ އުފަން ރަށް ކަމަދޫއަށް ވަޑައިގެންފަ އެވެ. އޭގެ ފަހުން ޒާރާގެ އާއިލާގެ މެމްބަރުން ވަނީ ސިޔާމުގެ ރިސޯޓެއް ކަމަށްވާ ސިޔާމް ވޯލްޑްގައި ޗުއްޓީ ހޭދަކުރުމަށް ގޮސްފަ އެވެ. އެ މީހުން ގެންދިޔައީ ކަމަދޫން ސީޕްލޭނެއްގައި ކަމަށްވެ އެވެ.

ބައެއް ނޫސްތަކުން ރިޕޯޓްކޮށްފައިވާ ގޮތުގައި ޒާރާ ސިޔާމް އާ ކައިވެނި ކުރުމަށް ރަން ކިޔާފައިވަނީ ދެ ގެސްޓްހައުސްއަށެވެ. އެއީ ޒާރާއާ އޭނާގެ ދައްތައާ ދެމީހުނަށް ދެ ގެސްޓްހައުސް ކަމަށްވެ އެވެ.

ޒާރާއާ ސިޔާމްގެ ކައިވެނީގެ އަޑު ފެތުރިފައިވަނިކޮށް، މި މަހު ސިޔާމް ވަނީ ކަމަދޫ ހުރިހާ ރައްޔިތުންނަށް ހިލޭ ބޭސްފަރުވާ ކޮށްދިނުމަށް ނިންމާފަ އެވެ. އެރަށު ކައުންސިލުން ބުނީ މި ނިންމުން ނިންމީ "ސިޔާމް ކެއާ" އާ އެ ކައުންސިލާއެކު ބޭއްވުނު މަޝްވަރާ ބައްދަލުވުންތަކަށް ފަހުގައި ކަމަށެވެ.

ޒާރާއަކީ މިދިޔަ ބޮޑު އީދު ތެރޭގައި ކަމަދޫގައި ބޭއްވި ކުޅިވަރުތަކުގައި އޭނާގެ ނެށުމުގެ ފަރި ހަރަކާތްތަކުން އެތައް ބައެއްގެ ސަމާލުކަން ލިބި ސޯޝަލް މީޑިއާގައި ވައިރަލްވި ޒުވާނެކެވެ.