ސަރުކާރު ހިއްސާވާ ކުންފުނިތަކުގެ ތެރެއިން ވަޒީފާ ބަހާ ކަމަށް މަޝްހޫރު އެއް ކުންފުނި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ގިނަ އަދަދެއްގެ ވަޒީފާ ބަހައިފި އެވެ.

މައުލޫމާތު ހޯދާ ލިބިގަތުމުގެ ގާނޫނުގެ ދަށުން "ހުރިހާ" އިން ފޮނުވި ސުވާލަކަށް އެޗްޑީސީން ދިން ޖަވާބުގައި ވަނީ 17 ނޮވެމްބަރު 2023 އިން ފެށިގެން މިމަހުގެ 8 ގެ ނިޔަލަށް އެ ކުންފުނީގެ އެކި މަގާމުތަކަށް 206 މީހަކު ނަގާފައިވާ ކަމަށެވެ. އަދި އެ މުއްދަތުގައި 119 މީހަކު އެ ކުންފުނީގެ ވަޒީފާއިން ވަކިކޮށްފައިވާ ކަމަށް ވެސް ބުނެފައިވެ އެވެ.

މިދިޔަ ރައްޔިތުންގެ މަޖިލީހުގެ އިންތިހާބާ ދިމާކޮށް ވެރިކަންކުރާ ޕީއެންސީގެ ގިނަ އަދަދެއްގެ އެކްޓިވިސްޓުންނަށާއި އިންތިހާބުގައި ވާދަކުރި އެ ޕާޓީގެ ކެންޑިޑޭޓުން އަންގައިގެން ގިނަ އަދަދެއްގެ ވަޒީފާ އެޗްޑީސީން ބަހާފައިވާ ކަމަށް އަޑުއިވިފައިވެ އެވެ. އަދި ކުރީ ސަރުކާރުން ވަޒީފާ ދިން ގިނަ އަދަދެއްގެ މީހުން ވަކިކުރަމުން އަންނަ ކަމަށް ވެސް އެނގިފައިވެ އެވެ.

މަޖްލިސް އިންތިހާބުގެ ކެމްޕޭން ދުވަސްވަރު ސަރުކާރު ކެންޑިޑޭޓުންތަކެއް ގޮވައިގެން އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ހުޅުމާލޭގެ 2 ގައި ކެމްޕޭންކުރަނީ. ފޮޓޯ: އެޗްޑީސީ

ސަރުކާރުގެ 100 ޕަސެންޓް ހިއްސާވާ ކުންފުނީގައި މެނޭޖްމަންޓްގައި 128 ފިރިހެން މުވައްޒަފުން އަދި 39 އަންހެން މުވައްޒަފުން ހިމެނެ އެވެ. މީގެ އިތުރުން އެ ކުންފުނީގެ އެހެން ވަޒީފާތަކުގައި 1194 ފިރިހެން މުވައްޒަފުންނާއި 313 އަންހެން މުވައްޒަފުން މަސައްކަތް ކުރެ އެވެ.

އެޗްޑީސީގެ މުވައްޒަފުންގެ މުސާރައިގެ ގޮތުގައި ހޭދަކުރާ މިންވަރު ވެސް ވަނީ ވަރަށް ބޮޑަށް އިތުރުވެފަ އެވެ. އެގޮތުން މިއަހަރުގެ ފުރަތަމަ ކުއާޓަރުގައި 123,1 މިލިއަން ރުފިޔާ މުސާރައިގެ ގޮތުގައި އެ ކުންފުނިން ހޭދަކޮށްފައިވެ އެވެ. އެކަމަކު މިދިޔަ އަހަރުގެ ފަހު ކުއާޓަރުގައި ހޭދަކޮށްފައި ވަނީ 117,34 މިލިއަން ރުފިޔާ އެވެ.

އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު އެ ކުންފުނީގެ ބޯޑު މެމްބަރުންނާއި އިސްވެރިންތަކަކާއެކު ފޮޓޯއަކަށް ހުއްޓިގެން. ފޮޓޯ: އެޗްޑީސީ

އެ ކުންފުންޏަށް ލިބިފައިވާ އާމްދަނީއަށް ބަލާއިރު މިއަހަރުގެ ފުރަތަމަ ކުއާޓަރުގައި ބިން ވިއްކައިގެން 911 މިލިއަން ރުފިޔާ ލިބިފައިވެ އެވެ. އަދި ބިމު ކުލީގެ ގޮތުގައި 146 މިލިއަން ރުފިޔާ ލިބިފައިވާ ކަމަށް މާލީ ހިސާބުތަކުން ދައްކަ އެވެ.