މިފަހުން އިންޑިއާގެ މަހުޖަނު އަމްބާނީ އާއިލާއަށް ނިސްބަތްވާ އާނަންތު އަމްބާނީއާ ކައިވެނިކުރި ރަދިކާ މާޗަންތުއަށް ކައިވެނީގެ ހަދިޔާއެއްގެ ގޮތުގައި އޭނާގެ މައިދައިތައާއި ބަފާބެގެ ފަރާތުން ދުބާއީއިން ގެއެއް ދީފި އެވެ.

އިންޑިއާގެ ހަބަރުތައް ބުނާ ގޮތުގައި ދުބާއީގެ އެންމެ މަޝްހޫރު އެއް ސަރަހައްދު ކަމަށްވާ ޕާމް ޖުމައިރާގައި ހުންނަ 640 ކްރޯޑް އިންޑިއާ ރުޕީސްގެ އެ ގެއަކީ އެ ސަރަހައްދުގައި ހުރި އެންމެ އަގުބޮޑު އެއް ގެ އެވެ.

އެންމެ ފަހުގެ ޒަމާނީ ފެންވަރަށް ހަދާފައިވާ އެ ގެއަކީ ޕާމް ޖުމައިރާގެ އައްސޭރި ފަށުގައި ހުންނަ ގެއެކެވެ. އެހެން ކަމުން އެގެއަށް ޕްރައިވެޓް ބީޗެއް ވެސް ލިބިފައިވެ އެވެ.

އިޓަލީގެ މާބަލްއާއި އެނޫން ވެސް އަގުބޮޑު ތަކެތި ބޭނުން ކޮށްގެން ޝާހީ ފެންވަރަށް ހަދާފައިވާ 10 ކޮޓަރީގެ އެ ގެއަކީ އަމްބާނީ އާއިލާއިން ބާއްވާ ފެންވަރުގެ އެއްވުންތައް ބާއްވަން އެންމެ އެކަށޭނަ ގެއެއް ކަމަށް ހަބަރުތައް ބުނެ އެވެ.

މި ހަދިޔާއަކީ އާނަންތުއާއި ރަދިކާގެ މެދުގައިވާ ވަރުގަދަ ލޯބީގެ ނިޝާނެއްގެ ގޮތުން ދިން ހަދިޔާއެއް ކަމަށް ވެސް އަމްބާނީ އާއިލާއާ ގުޅުންހުރި މަސްދަރުތަކުން ބުނެފައިވެ އެވެ.

ވަރަށް ޅަ އުމުރުން ފެށިގެން ވެސް ލޯބީގެ ގޮތުން ގުޅިގެން އުޅުނު އާނަންތުއާއި ރަދިކާ ކައިވެނި ކޮށްފައިވަނީ މި އަހަރު ބޭއްވި ކުލަގަދަ ހަފްލާތަކަކަށްފަހު އެވެ.