މިހާރު ސިނަމާތަކުގައި ދައްކަމުން އަންނަ ލޭޑީ ގާގާގެ ފިލްމު "ޖޯކާ 2"އަށް ބޮކްސް އޮފީހުގައި ލިބެމުން އަންނަނީ ފިނި ތަރުހީބެއް ކަމަށް ހަބަރުތައް ބުނެފި އެވެ.

މީގެ ފަސް ދުވަސް ކުރިން ރިލީޒް ކުރެވުނު އެ ފިލްމަށް މާ ބޮޑު އާމްދަނީއެއް ލިބިފައި ނުވާއިރު ގިނަ ޝޯތައް ކުރިއަށްދަނީ "ހުސް ގޮނޑިތަކާއެކު" ކަމަށް ރިޕޯޓުތައް ބުނެ އެވެ.

މާލީ ގޮތުން ފިލްމަށް ގެއްލުންތަކެއް ލިބެމުންދާ މި ދަނޑިވަޅުގައި ފަންނީ ގޮތުން ވެސް އެ ފިލްމަށް އަންނަނީ ފާޑުކިޔުންތައް އަމާޒު ވަމުންނެވެ.

އެގޮތުން އެ ފިލްމުގެ އެކްޓިންއާއި ޑައިރެކްޝަންގެ އިތުރުން ވާހަކައަކީ ވެސް ބޮޑު ޖޯކެއް ކަމަށާއި އެއީ މީހުންގެ މަލާމާތް ހައްގު މަސައްކަތެއް ކަމަށް ފިލްމް ކްރިޓިކްސް ވެސް އަންނަނީ ބުނަމުންނެވެ.

"ލޭޑީ ގާގާއަކަށް ވެސް މި ފިލްމު ސަލާމަތެއް ނުކުރެވުނު" އެ ފިލްމާ ބެހޭގޮތުން މީޑިއާގައި އާއްމު ކޮށްފައިވާ ރިވިއުއެއްގައި ލިޔެފައިވެ އެވެ.

"ޖޯކާ"ގެ ފުރަތަމަ ފިލްމަށް ބެލުންތެރިންގެ ހޫނު ތަރުހީބެއް ލިބުނުއިރު ދެވަނަ ފިލްމުގެ ފެންވަރު ދަށްވުމުން ގިނަ ބަޔަކު އަންނަނީ މާޔޫސްކަން ފާޅު ކުރަމުންނެވެ.