ދައުލަތުން 2021ވަނަ އަހަރު ނަގާފައިވާ 500 މިލިއަން ޑޮލަރު (7.7 ބިލިއަން ރުފިޔާ) ސުކޫކުގެ ކޫޕަން ޕޭމަންޓުގެ ގޮތުގައި މި މަހު ދައްކަންޖެހޭ 25 މިލިއަން ޑޮލަރު މިއަދު ސަރުކާރުން ދައްކައިފި އެވެ.

ސުކޫކުގެ އިންޓްރެސްޓް ޕޭމަންޓް ދެއްކި އިރު އެ ފައިސާ ނުދެއްކި، ސުކޫކު ޑިފޯލްޓް ވެދާނެ ކަމަށް ކުރިން ވަނީ ބައެއް ބޭރުގެ މީޑިއާ ތަކުންވެސް ރިޕޯޓްކޮށްފަ އެވެ. ޑިފޯލްޓް ވެދާނެކަމުގެ ވާހަކަތައް ދެކެވުނީ މޫޑީސްއިން ރާއްޖޭގެ ރޭޓިން ސީއޭއޭ1އިން ސީއޭއޭ2އަށް ދަށްކުރުމާ ގުޅިގެންނެވެ.

ފިނޭންސް މިނިސްޓްރީން ނެރުނު އިއުލާނެއްގައި ބުނީ، 2021 ވަނަ އަހަރު ސަރުކާރުން ވިއްކި 500 މިލިއަން ޑޮލަރުގެ ސުކޫކުގެ ކޫޕަން ޕޭމަންޓުގެ ގޮތުގައި ދައްކަންޖެހޭ ފައިސާ މިއަދު ދައްކާފައިވާ ކަމަށެވެ.

ފިނޭންސުން ބުނީ ދަރަނި އަދާކުރުމަކީ ސަރުކާރުން އިސްކަންދޭނެ ކަމެއް ކަމަށެވެ. ދަރަނީގެ ގޮތުގައި ދައްކަންޖެހޭ ފައިސާ ދައްކަން އޮތް މުއްދަތުގައި ދެއްކުމުން ކްރެޑިޓަރުންނާއި އިންވެސްޓަރުންނަށް ސަރުކާރުން ދަރަނި އަދާކުރާނެކަމުގެ ޔަގީންކަން ލިބޭނެ ކަމަށް ވެސް އެ މިނިސްޓްރީން ބުނެ އެވެ.

ކޮންމެ އަހަރަކުވެސް ދެ ފަހަރަކު ސުކޫކުގެ ކޫޕަން ޕޭމެންޓުގެ ގޮތުގައި ސަރުކާރުން ފައިސާ ދައްކަންޖެހެ އެވެ. މި އަހަރު ކޫޕަން ފައިސާގެ ފުރަތަމަ ބައި ދެއްކީ މާޗު މަހުގަ އެވެ.