ގިނަބައެއްގެ ސަމާލުކަން ލިބިފައިވާ ބ. ކަމަދޫ އާމިނަތު ޒާރާ އާއި މަޝްހޫރު ވިޔަފާރިވެރިޔާ އަހުމަދު ސިޔާމް މުހައްމަދުގެ ކައިވެނީގެ ފަހުގެ ތައްޔާރީތައް ކުރިއަށްދާއިރު، ކަމަދޫއަށް ވަނީ ތިން އަސް ގެންގޮސްފަ އެވެ.

ކުރިންވެސް ހަމަޖެހިފައި ވާގޮތަށް މި މަހުގެ 10، މާދަމާ ދެމީހުން ކައިވެނި ކުރާކަން ވަނީ އެނގިފަ އެވެ.

މި އަހަރު ކަމަދޫގެ ބޮޑު އީދު ޝޯތަކުން މަގްބޫލުކަން ހޯދާފައިވާ ނެށުންތެރިޔާ ޒާރާ އާއި ވިޔަފާރިވެރިޔާ ސަން ޓްރެވަލް ސިޔާމް ކައިވެނިކުރަން ނިންމާ ރަންކިޔާފައިވަނީ މިދިޔަ މަހު އެވެ.

ކައިވެނީގެ ހަފްލާއެއް ކަމަދޫގައި ބާއްވަން ހަމަޖެހިފައިވާއިރު، ކައިވެނި ހަފްލާ އޮތީ ސިޔާމް ވޯލްޑްގައި ކަމަށްވެ އެވެ.

ޒާރާ އާއި ސިޔާމްގެ ކައިވެނީގެ ހަފްލާއަށް ކަމަދޫއަށް އަސް ގެންގޮސްފައިވާއިރު، ހުސްވި އޮގަސްޓް މަހު ސިޔާމް ވަނީ ކަމަދޫ ހުރިހާ ރައްޔިތުންނަށް ހިލޭ ބޭސްފަރުވާ ކޮށްދިނުމަށް ނިންމާފަ އެވެ.

އެރަށު ކައުންސިލުން ބުނީ މި ނިންމުން ނިންމީ "ސިޔާމް ކެއާ" އާ އެ ކައުންސިލާއެކު ބޭއްވުނު މަޝްވަރާ ބައްދަލުވުންތަކަށް ފަހުގައި ކަމަށެވެ.