ގައުމީ އެއާލައިން، މޯލްޑިވިއަންގެ ދަތުރުތައް ކޫއްޑޫ އެއާޕޯޓަށް އަލުން ވަރަށް އަވަހަށް ފެށޭނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި އަމީން ވިދާޅުވީ މޯލްޑިވިއަން އިން ކޫއްޑުއަށް ދަތުރުތައް ހުއްޓާލަން ނިންމީ ދިގު މުއްދަތެއްގައި އެއާޕޯޓް މަރާމާތު ނުކުރެވި އަދި ރަންވޭ މިހާރު އޮތް ހާލަތުގެ ސަބަބުން، މޯލްޑިވިއަންގެ ދެ ބޯޓަކަށް ލިބުނު ގެއްލުމާ ގުޅިގެން ކަމަށެވެ.

މިނިސްޓަރު ވިދާޅުވީ ޓްރާންސްޕޯޓް މިނިސްޓްރީގެ އިސް ނެގުމާ އެކު، ސިވިލް އޭވިއޭޝަން އޮތޯރިޓީ އާއި އެއާޕޯޓް އޮޕަރޭޓަރު އަދި ގުޅުންހުރި ފަރާތްތަކާ ގުޅިގެން މައްސަލަ ހައްލުކުރުމުގެ މަސައްކަތް މިހާރު ވަނީ ފަށާފައިވާ ކަމަށެވެ.

ކޫއްޑު އެއާޕޯޓުގެ ރަންވޭގެ ފެންވަރު ދަށްވެގެން އެ އެއާޕޯޓަށް ދަތުރު ނުކުރުމަށް މޯލްޑިވިއަންއިން ނިންމީ އިއްޔެ އެވެ.

އެ އެއާޕޯޓް ހިންގަނީ ރާއްޖެއިން ބޭރުގެ ކުންފުންޏަކުންނެވެ. އެއާޕޯޓުގެ ތަރައްގީއަށް އެއްވެސް މަސައްކަތެއް މިހާތަނަށް ކޮށްފައިނުވާ ކަމަށް "ހުރިހާ"އާ ވާހަކަދެއްކި މުވައްޒަފުން ކިޔައިދިނެވެ.

އެ އެއާޕޯޓް ހިންގާ ކުންފުނިން މުވައްޒަފުންގެ މުސާރައަށް ވެސް އެއްވެސް ހެޔޮބަދަލެއް ފާއިތުވި ތަނުގައި ގެނެސްފައިނުވުމަކީ މުވައްޒަފުންގެ ވަރަށް ބޮޑު ކަންބޮޑުވުމެކެވެ.

"މުވައްޒަފުންގެ މުސާރަ ބޮޑުކޮށެއް ނުދޭ. އަޅުގަނޑުމެން އެތައް ފަހަރަކު އާދޭސް ކުރިން. އެކަމަކު އެކަމެއް ކޮށެއް ނުދިން. މި އެއާޕޯޓްގެ ރަންވޭ މަރާމާތު ނުކުރާތާ މިހާރު ހަތް އަހަރު މިވަނީ ވެފައި. މިކަން ބަލާނެ އެއްވެސް މުއައްސަސާއެއް އެއްވެސް ސަރުކާރެއްގައި ނެތް،" އެ އެއާޕޯޓްގެ މުވައްޒަފަކު ކިޔައިދިނެވެ.