އަމީތާބު ބައްޗަންއާއި ރޭކާއަކީ 1980ގެ އަހަރުތަކުގައި ބޮލީވުޑްގެ ފިލްމުތަކުން އާއްމުންގެ އެންމެ ބޮޑު މަގުބޫލުކަމެއް ހޯދި ޖޯޑު ކަމަށް ބުނެވިދާނެ އެވެ.

"ދޯ އަންޖާނޭ"، "ޚޫން ޕަސީނާ" އަދި "ގަންގާ ކީ ސޯގަންދް" ފަދަ ފިލްމުތަކުން ގިނަ ބައެއްގެ ލޯބި ހޯދާފައިވާ އެ ދެ ތަރިން އެންމެ ފަހުން އެކުގައި ފެނިގެންދިޔައީ ޖާޔާ ބައްޗަން ވެސް ފެނިގެންދިޔަ 1980 ވަނަ އަހަރު ނުކުތް ފިލްމު "ސިލްސިލާ" އިންނެވެ.

އެ ފިލްމަށްފަހު އެތައް އަހަރެއް ވަންދެން އެ ދެތަރިން ބޮލީވުޑުގައި ހަރަކާތްތެރިވި ނަމަވެސް އެކުގައި ދުވަަހަކުވެސް މަސައްކަތް ކޮށްފައެއް ނުވެ އެވެ.

މިކަމާ ބެހޭގޮތުން 2006 ވަނަ އަހަރު ދިން އިންޓަވިއުއެއްގައި ރޭކާ ބުނީ އަމީތާބާއެކު މަސައްކަތް ކުރުން ހުއްޓާލީ އޭނާއާއެކު މަސައްކަތް ކުރަން ހައްގު ނޫން ކަމަށް އިހުސާސްވުމުން ކަމަށެވެ.

"އަމީތާބު ކަހަލަ ކާމިޔާބު ތަރިއަކަށް ވެވެންދެން އަދި އޭނާއާ އެއްހަމައެއްގައި މަސައްކަތް ކުރެވެންދެން ދުރުވެލީ،" ރޭކާ ބުނެފައިވެ އެވެ.

ރޭކާ މިހެން ބުނި ނަމަވެސް އޭނާއާއި އަމީތާބު އެކުގައި މަސައްކަތް ކުރުން ހުއްޓާލީ އެ ދެމީހުންގެ މެދުގައި އުފެދެމުން އައި ލޯބީގެ ގުޅުން ނިމުމަކަށް އައުމުން ކަމަށް ގިނަ ބަޔަކު ގަބޫޫލުކުރެ އެވެ.

އެގޮތުން "ސިލްސިލާ"ގެ މަސައްކަތް ކުރިއަށް ދިޔަ ދުވަސްވަރު އެމީހުންގެ ގުޅުމުގެ ވާހަކަ މީޑިއާގައި ވަރަށް ގަދައަށް ފެތުރުނެވެ.