ބިޝްނޯއީ ގޭންގުގެ ކިބައިން ސަލްމާން ޚާން މައާފަށް އެދެން ޖެހޭ ކަމަށް ބޮލީވުޑްގެ މިއުޒިކް ޑިރެކްޓަރު އަދި ލަވަކިޔުންތެރިޔާ އަނުޕް ޖަލޯޓާ ބުނެފި އެވެ.

އިންޑިއާ ޓުޑޭއަށް ދިން އިންޓަވިއުއެއްގައި އަނުޕް ބުނީ މައްސަލަ އިތުރަށް ބޮޑުކޮށްގެން އެއްވެސް މީހަކަށް ވާނެ ފައިދާއެއް ނެތް ކަމަށާއި އެހެންކަމުން މައާފަށް އެދި އެކަން ނިންމާލުން ބުއްދިވެރި ކަމަށެވެ.

"އެންމެ މުހިއްމު ކަމަކީ މިކަންތައް ގަނޑުގައި ބައެއްގެ ފުރާނައަށް ނުރައްކާ ވަމުންދާކަން. އެހެންވީމަ އެންމެ ރަނގަޅު ގޮތަކީ އަމާން ދިނުމަށްފަހު މައާފަށް އެދުން" އަނުޕް ބުންޏެވެ.

1998 ވަނަ އަހަރު ހިނގި ބްލެކް ބަކް މަރާލުމުގެ ހާދިސާއާ ގުޅުވައިގެން ބިޝްނޯއީ ގޭންގުން ސަލްމާނާއި އޭނާގެ ގާތް ފަރާތްތަކަށް އަންނަނީ އިންޒާރު ދެމުންނެވެ.

އެގޮތުން މި ހިނގާ އޮކްޓޯބަރު މަހުގެ ކުރީކޮޅު ސަލްމާންގެ ގާތް ރަހުމަތްތެރިއެއް ކަމަށްވާ ބާބާ ސިއްދީގީގެ ގަޔަށް ބަޑިޖަހާ މަރާލާފައިވާއިރު އެ ހަމަލާގެ ޒިންމާ ބިޝްނޯއީ ގޭންގުން ވަނީ ނަގާފަ އެވެ.

މިކަމަށް އޮތް ހަމައެކަނި ހައްލަކީ ބިޝްނޯއީ ކޮމިއުނިޓީގެ ފައްޅިއަކަށް ސަލްމާން އައިސް ތައުބާވެ މައާފަށް އެދުން ކަމަށް ބިޝްނޯއީ ގޭންގުން ބުނެފައިވެ އެވެ.

އެހެން ނަމަވެސް މިހާތަނަށް ސަލްމާންގެ ފަރާތުން އަމާން ދިނުމުގެ އެއްވެސް އިޝާރާތެއް ފެނިފައިނުވާއިރު އޭނާ އަންނަނީ އޭނާގެ ސެކިއުރިޓީ އިތުރަށް ވަރުގަދަ ކުރަމުންނެވެ.