މަޝްހޫރު ފެންޓަސީ ވާހަކަ "ހެރީ ޕޮޓާ"ގެ މައްޗަށް ބިނާކޮށް ސީރީޒްއެއް އުފައްދަން ވާނަސް ބްރޯސްއިން ނިންމައި އެކަން އިއުލާން ކޮށްފި އެވެ.

އެ ކުންފުނީގެ ސީއީއޯ ޗެނަންގް ޑަންގޭ ވިދާޅުވީ އެ ސީރީޒް ވެގެން ދާނީ މިހާތަނަށް ރިލީޒް ކުރެވިފައިވާ ހެރީ ޕޮޓާގެ އުފެއްދުންތަކަށްވުރެ ބޮޑަށް އެ ވާހަކައިގެ ތަފްސީލުތައް ގެނެސްދޭނެ ސީރީޒްއަކަށް ކަމަށެވެ.

އޭނާ އިތުރުން ހެރީ ޕޮޓާގެ ސީރީޒް ވެގެންދާނީ ދެ ގަޑިއިރުގެ ފިލްމަކަށްވުރެ ފުޅާ ދާއިރާއެއްގައި ވާހަކަ ގެނެސްދީ ބެލުންތެރިން ޝައުގުވެރިވާނެ ސީރީޒްއަކަށް ކަމަށް ވެސް ޑަންގޭ ބުނެފައިވެ އެވެ.

މިހާރު ޕްރީ ޕްރޮޑަކްޝަންގެ މަސައްކަތް ކުރަމުން އަންނަ އެ ސީރީޒް ދުރަށް ދައްކާނީ ވާނަސް ބްރޯސްގެ ސްޓްރީމިން ޕްލެޓްފޯމް އެޗްބީއޯ މެކްސް އިންނެވެ.

ރިޕޯޓުތައް ބުނާ ގޮތުގައި މި ސީރީޒްގެ ސްކްރީން ޕްލޭ ލިޔާނީ މަޝްހޫރު ލިޔުންތެރިޔާ ފްރާންސެސްކާ ގާޑިނާ އެވެ. އެއާއެކު ސީރީޒްގެ ގިނަ އެޕިސޯޑުތައް ޑައިރެކްޓްކުރާނީ އެމީ އެވޯޑު ލިބިފައިވާ މާކް މައިލޮޑް އެވެ.

ޖޭކޭ ރޯލިންގް ގެ މަޝްހޫރު ވާހަކަ ފޮތް "ހެރީ ޕޮޓާ"ގެ މައްޗަށް ބިނާކޮށް މިހާތަނަށް ގިނަ ލައިވް އެކްޝަން ފިލްމުތަކެއް ނެރެފައިވެ އެވެ. އެހެން ނަމަވެސް މިއީ އެ ވާހަކައަށް ސީރީޒްއެއް ހަދާ ފުރަތަމަ ފަހަރެވެ.