ދުންފަތުގެ އިސްތިއުމާލް ކުރުމަށް ވަރަށް ބޮޑަށް އާދަވެ ދުވާލަކު ދެ ފޮށި ސިނގިރޭޓް ބައްލަވާ ކަމަށް އެއްބަސްވެވަޑައިގެން، ނަމަވެސް ވޭޕް އެތެރެކުރުން މަނާކުރާ ތާރީޚް ކަމަށްވާ ނޮވެމްބަރު 15 އިން ފެށިގެން އެކަން ހުއްޓާލައްވާނެ ކަމަށް ނ. ވެލިދޫ ދާއިރާގެ މަޖިލިސް މެންބަރު މުހައްމަދު އައްބާސް ވިދާޅުވެއްޖެ އެވެ.

ސިނގިރޭޓާއި ބިޑިން ނަގާ ޓެކުހާއި ޑިއުޓީ ބޮޑުކުރުމަށް އިމްޕޯޓު އެކްސްޕޯޓު ގާނޫނަށް ސަރުކާރުން ހުށަހެޅި އިސްލާހާ ގުޅިގެން މަޖިލީހުގައި އިއްޔެ ވާހަކަ ދައްކަވަމުން އައްބާސް ވިދާޅުވީ އެ އިސްލާހުތަކަކީ މާދަމާގެ ޒުވާން ޖީލު ދުންފަތާއި މަސްތުވާތަކެތީގެ ވަބާއިން ސަލާމަތްވުމަށް އެޅިގެންދާ ވަރުގަދަ ފިޔަވަޅަކަށް ވާނެ ކަމަށެވެ. އެހެންވެ އޭނާ ވެސް އަޒުމު ކަނޑައަޅުއްވައިގެން ހުންނެވީ ވޭޕު އެތެރެކުރުން މަނާ ކުރަން ނިންމާފައިވާ ތާރީޚު ކަމަށްވާ ނޮވެމްބަރު މަހުގެ 15 އިން ފެށިގެން ދުންފަތާ ދުރަށް ވަޑައިގަތުން ކަމަށެވެ.

"އަޅުގަނޑަކީ ދުވާލަކު ދެ ފޮށި ސިނގިރޭޓު މިހާރު ވެސް ބޯމީހެއް. ނޮވެމްބަރު 15 ވަނަ ދުވަހުން ފެށިގެން، މާތްﷲގެ ތަނަވަސް ރަހުމަތާ އެކު ސިނގިރޭޓު ބުއިން ހުއްޓާލަން އަޅުގަނޑު ނިންމައިފިން،" ސަރުކާރުން ހުށަހަޅާފައިވާ އިސްލާހަށް ތާއީދު ކުރައްވައި އައްބާސް ވިދާޅުވި އެވެ.

އެމްޑީއޭގެ ފަރާތުން މަޖިލިސް ތަމްސީލް ކުރާ މެންބަރުގެ މި ނިންމެވުމާ އެކު މަޖިލީހުގެ ތަޅުމުން އޭނާ އަށް ހޫނު ތަރުހީބެއް ލިބުނެވެ.

ސިނގިރޭޓާއި ބިޑިން ނަގާ ޓެކުހާއި ޑިއުޓީ ބޮޑުކުރުމަށް އިމްޕޯޓު އެކްސްޕޯޓު ގާނޫނަށް ސަރުކާރުން ހުށަހެޅި އިސްލާހުގައި ވަނީ އަންނަ މަހުގެ 15 އިން ފެށިގެން ރާއްޖޭގައި ވޭޕް ކުރުމާއި އެ ކަމަށް ބޭނުންވާ ތަކެތި އެތެރެ ކުރުން މަނާ ކުރަން ސަރުކާރުން ނިންމާފައި ވާއިރު، އެ ދުވަހާ ހަމައަށް އެތެރެކުރާ ވޭޕާއި އެއާ ގުޅުން ހުރި ތަކެތިން ނަގާ ޑިއުޓީ ބޮޑުކުރުމަށެވެ. އަދި އީ-ސިނގިރޭޓަށް ނުވަތަ ދުންފަތުގެ އިސްތިއުމާލުކުރުމަށް ބޭނުންކުރާ އެ ނޫން ވެސް އާލާތްތަކަށް އަޅާ ފްލޭވާ އާއި ކެމިކަލް އިން ނަގާ ޑިއުޓީ 50 ޕަސެންޓް ބޮޑުކޮށް، އީ-ސިނގިރެޓާއި ވޭޕް ކުރުމަށް ބޭނުންކުރާ އާލާތްތަކާއި ޓޮބޭކޯ ހީޓިން ޕްރޮޑަކްޓްތައް ނުވަތަ އާލާތްތަކާއި އެ ތަކެތީގެ ބައި ބަޔަށް ނަގާ ޑިއުޓީ 200 ޕަސެންޓް ބޮޑުކުރުމަށެވެ.

އީ-ސިނގިރޭޓްފަދަ ވޭޕްކުރަން ބޭނުންވާ އާލާތްތައް ރާއްޖެ އެތެރެކުރުމާއި ވިއްކުމާއި ހިލޭ ބެހުމާއި ބޭނުންކުރުން މަނާކުރުމަށް ވެސް ވަނީ ހުށަހަޅައިފަ އެވެ. އެފަދަ ތަކެތި ރާއްޖެއަށް އެތެރެކޮށްފިނަމަ 50،000 ރުފިޔާއިން ޖޫރިމަނާކުރުމާއެކު އެތެރެކުރާ ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާކުރާނެކަމަށް އިސްލާހުގައިވެ އެވެ.

ވޭޕްކުރަން ބޭނުންކުރާ އެއްވެސް ބާވަތެއްގެ އާލާތެއް ރާއްޖޭގައި ވިއްކައިފިނަމަ އެ ފަރާތެއް 20،000 ރުފިޔާއިން ޖޫރިމަނާކުރުމާ އެކު ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާކުރަން ބިލުގައި ހިމަނުއްވާފައިވާއިރު، އެފަދަ އާލާތެއް ހިލޭ ބަހައިފިނަމަ އެ އަމަލެއް ކުރި މީހަކު 10،000 ރުފިޔާއިން ޖޫރިމަނާ ކުރާނެ އެވެ. އަދި ވޭޕުގެ އެއްވެސް ބާވަތެއް ބޭނުންކޮށްފި މީހަކު 5،000 ރުފިޔާއިން ޖޫރިމަނާކުރުމަށް ވެސް ދުންފަތް ކޮންޓްރޯލް ކުރުމާބެހޭ ގާނޫނަށް ހުށަހަޅުއްވާފައިވާ އިސްލާހުގައި ވަނީ ބުނެފަ އެވެ.

މީގެ އިތުރުން ވޭޕް ކުރުމަށް ބޭނުންކުރާ އެއްވެސް އާލާތެއް ކުޑަކުއްޖަކަށް ވިއްކައިފިނަމަ ނުވަތަ ހިލޭ ދީފިނަމަ އެފަދަ އާލާތްތައް ވިއްކުމުންނާއި ހިލޭ ބެހުމުން ކުރާ ޖޫރިމަނާގެ އިތުރަށް 50،000 ރުފިޔާގެ ޖޫރިމަނާއެއް ކުރުމަށްވެސް ވަނީ ހުށަހަޅައިފަ އެވެ.

މި އިސްލާހުގެ ދަށުން ރާއްޖެއަށް ދުންފަތުގެ ބާވަތްތައް އެތެރެކޮށް، ބޭރުކުރާ އަދި ގަނޑުކޮށްނާއި ވަކިވަކިން ވިއްކާ ކޮންމެ ފަރާތެއް ވެސް އެކަމަށް ހާއްސަ ލައިސަންސް ނަގަން ޖެހޭނެ އެވެ. މި ލައިސަންސް ހަމައެކަނި ދުންފަތާ ގުޅުންހުރި ވިޔަފާރި ހިންގުމަށް ދޫނުކުރާނެކަމަށް ވެސް އިސްލާހުގައިވެ އެވެ.