ހޮނިހިރު ދަތުރުގެ މި ހަފްތާގެ ސެގްމެންޓްގައި މި ބަލާލަނީ އެމެރިކާ ބައްރުގެ އެންމެ ނަން ހިނގާ އެއް ގައުމު ކަމަށްވާ ކެނެޑާގެ މަގުބޫލު މަންޒިލަކަށެވެ.
ދެކުނު ކެނެޑާގައި އޮންނަ ސްޕޮޓަޑް ލޭކް ނަމަކަށްކިޔާ ތިކިޖެހި ފެންގަނޑަކީ އެކި ސަބަބުތަކަށްޓަކައި ގިނަ ބައެއްގެ ސަމާލުކަން ލިބިފައިވާ ތަނެކެވެ.
ބައި މޭލު ދިގު އަދި ފުޅާ މިނުގައި ފަސް ފުޓްބޯޅަ ދަނޑުގެ ފުޅާމިން ހުންނަ މިފެން ގަނޑަކީ ހޫނު މޫސުމުގައި މި ސަރަހައްދުން ދަތުރުކުރާ އަދި މި ތަނަށް ޒިޔާރަތްކުރާ ފަރާތްތަކަށް ހައިރާންކަން ގެނުވާ ފަދަ ރީތި ފެން ގަނޑެކެވެ.
މި ފެންގަނޑަށް ޕޯލްކާ ޑޯޓް ލޭކް އޭ ވެސް ކިޔާއިރު މި ފެންގަނޑަށް މިފަދަ ނަންތައް ދެވެނީ ހޫނު މޫސުމުގައި ފެންގަނޑުގެ ފެންތައް އާތްވަށް ބަދަލުވެ ފެންގަނޑުގައި އެކުލެވޭ ވަކި މިނަރަލެއްގެ ސަބަބުން އުފެދޭ ކުދި ފެން ގަނޑުތަކެއް ވަކިވަކި ތިކި ތަކެއް ޖެހިފައި ހުންނަހެން ފެންނާތީ އެވެ.
މިއީ ދުނިޔޭގައިވާ އާދަޔާ ޚިލާފް ތަންތަނުގެ ތެރެއިން ފާހަގަ ކޮށްލެވޭ އެއްތަނެވެ. ދެކުނު ކެނެޑާގައި އޮންނަ މި ސްޕޮޓަޑް ލޭކްއަކީ އެކި ސަބަބުތަކަށްޓަކައި ގަނަ ބައެއްގެ ސަމާލުކަން ލިބިފައިވާ ތަނެކެވެ.
ކެނެޑާގެ ސްޕޮޓަޑް ލޭކްކެނެޑާގަ އޮންނަ އަޖާއިބުކުރުވަނިވި މި ފެންގަނޑުގައި ހުންނަ މިނަރަލްތަކުގެ ސަބަބުން ފެންގަނޑުގެ ކުލަ އެކި ދުވަސްވަރު ތަފާތު ވާއިރު ވަކި ފެންގަނޑުތައް އުފެދޭއިރު މިތަނުގައި 300 އަށްވުރެ ގިނަ ސްޕޮޓް ނުވަތަ ތިކި ހުންނަ ކަމަށް ބުނެވެ އެވެ.
ސަލްފޭޓް، މެގްނީސިއަމް، ޓައިޓޭނިއަމް އަދި ސޯޑިއަމްފަދަ އެކިއެކި މިނަރަލްތައް މި ފެންގަނޑުގައި އެކުލެވޭއިރު މިއީ ކެނެޑާގެ އިތުރުން މުޅި ދުނިޔެއިންވެސް ހޮވާލެވޭ ފަދަ އާދަޔާޚިލާފް ރީތި މަންޒަރުތަކެއް ބަލާ ފަރާތްތަކަށް ދައްކުވައިދޭ ތަނެކެވެ.
އެއާއެކު މި ފެންގަނޑަކީ ގުދުރަތީ ދިރުންތައް ވެސް މުއްސަނދި ފެންގަނޑަކަށްވާއިރު މުޅި އަހަރު ދުވަހުގެ ތެރޭގައި އެ ސަރަހައްދުން ފެހިކަމާއި ތާޒާކަން ފެނެ އެވެ.
މި ފެންގަނޑަށް ލިބިފައިވާ ތަފާތު ސިފަތަކުގެ ސަބަބުން އެ ފެންގަނޑު ވެފައި ވަނީ ކެނެޑާއަށް ޒިއާރަތްކުރާ ފަތުރުވެރިންގެ މެދުގައި މަގުބޫލު މަންޒިލަކަށެވެ.
