މިސް ޔުނިވާސްގައި ރާއްޖެއިން ބައިވެރިވުން ކުށްވެރިކޮށް އެކަން ހުއްޓާލުމަށް ސަރުކާރުން ގޮވާލައިފި އެވެ.

މިނިސްޓްރީ އޮފް ޔޫތް އެމްޕަވާމަންޓް އިންފޮމޭޝަން އެންޑް އާޓްސްއިން މިއަދު ނެރުނު އިއުލާނެއްގައި ބުނީ ދިވެހިންގެ ދީނާއި، ސަގާފަތާ، އަގީދާއާ ނުގުޅޭ ހަރަކާތްތަކާއި މުބާރާތްތައް ބޭއްވުމާއި އެފަދަ ކަންކަމުގައި ދިވެހިން ބައިވެރިވުމަކީ ސަރުކާރުން ބަލައިގަންނާނެ ކަމެއް ނޫންކަމަށެވެ.

މުބާރާތުގައި ދިވެއްސަކު ބައިވެރިވުމުގައި، ސަރުކާރުގެ ބައިވެރިވުމެއް އޮތްކަމަށް ދޭހަވާ މޭރުމަކުން ހަބަރު ފަތުރަމުން އަންނަ ކަމަށްވެސް އެ މިނިސްޓްރީން ބުނެފައިވެ އެވެ.

އެފަދަ ކަންކަމަކީ ދިވެހިން ގަބޫލުކުރާ އާންމު އަހުލާގީ މިންގަނޑުތަކާއި އުސޫލުތަކާ ވެސް ހިލާފު ކަންކަން ފާހަގަކޮށް، ރާއްޖެ ތަމްސީލުކުރުމުގެ ނަމުގައި ދިވެއްސަކު އެފަދަ ހަރަކާތަކަށް ދިއުން، ދިވެހި ސަރުކާރުން ވަނީ ކުށްވެރިކޮށްފަ އެވެ.

ސަރުކާރުން މިކަން ކުށްވެރިކޮށްފައިވާއިރު، ބައެއް ދީނީ އިލުމުވެރިންވެސް ދަނީ އެކަމާ ގުޅިގެން ސޯޝަލް މީޑިއާގައި ފާޑުކިޔަމުންނެވެ.

ދުނިޔޭގެ އެކި ކަންކޮޅުތަކުން ބައިވެރިވާ ރީތީގެ މުބާރާތް، މިސް ޔުނިވާސްގައި ފުރަތަމަ ފަހަރަށް ރާއްޖެ ތަމްސީލުކުރުމަށް ގޮސްފައިވަނީ 21 އަހަރުގެ މޮޑެލްއެއް ކަމަށްވާ މަރިޔަމް ޝައިނާ ނަސީމެވެ.

މި އަހަރުގެ މިސް ޔުނިވާސް މުބާރާތް ބޭއްވުމަށް ހަމަޖެހިފައިވަނީ ނޮވެމްބަރު 14 އިން 16 އަށް މެކްސިކޯގަ އެވެ.

މިއަހަރުގެ މިސް ޔުނިވާސް މުބާރާތުގައި 130 ގައުމަކުން ބައިވެރިވެއެވެ. ރާއްޖޭގެ އިތުރުން މި މުބާރާތުގައި އަލަށް ބައިވެރިވާ ގައުމުތަކުގެ ތެރޭގައި، ސޯމާލިއާ، ބެލަރޫސް، އިރާން، އުޒްބަކިސްތާން އަދި ޔުނައިޓެޑް އަރަބް އެމިރޭޓްސް ހިމެނެ އެވެ.