ބައިނަލްއަގްވާމީ ސިނަމާތަކުގައި އިއްޔެ ރިލީޒް ކޮށްފައިވާ ބޮލީވުޑްގެ ދެ ފިލްމު ކަމަށްވާ "ސިންގަމް އަގެއިން"އާއި "ބޫލް ބުލައްޔާ 3" ސައޫދީ އަރަބިއާގައި ދެއްކުން މަނާ ކޮށްފި އެވެ.

ސައޫދީގެ ސެންސަރު ބޯޑުން އެ ދެ ފިލްމު މަނާކޮށްފައިވަނީ އެ ފިލްމުތަކުގައި ހިމެނޭ ދީނާ ހިލާފު އަދި ޖިންސީ މަންޒަރުތަކެއް ހިމަނާފައިވާތީ އެވެ.

އެގޮތުން "ސިންގަމް އަގެއިން" ދީނީ ހިލާފުވުންތައް ދައްކާފައިވާއިރު "ބޫލް ބުލައްޔާ 3"ގައި ގިނަ ޖިންސީ މަންޒަރުތަކެއް އެކުލެވޭ ކަމަށް ރިޕޯޓުތައް ބުނެ އެވެ.

އެގައުމުގެ ސެންސަރު ބޯޑަކީ ހަރުކަށި ގަވާއިދުތަކެއް ގެންގުޅޭ އިދާރާ އެކެވެ. އެ ގަވާއިދުތަކާ އެއްގޮތަށް ބައެއް ފިލްމުތައް އެޑިޓް ކުރެވޭއިރު އަނެއްބައި ފިލްމުތައް މުޅިން މަނާކުރެވެ އެވެ.

ސައޫދީ އަރަބިއާ ނޫން ދުނިޔޭގެ އެހެން ގައުމުތަކުގައި އެ ދެ ފިލްމު މިއަދު ރިލީޒް ކުރެވިފައިވާއިރު ހިންދޫންގެ އީދެއް ކަމަށްވާ ދިވާލީއާ ދިމާވުމުން ދެ ފިލްމަށް ވެސް ބޮޑު ކާމިޔާބެއް ލިބޭނެ ކަމަށް ބެލެވެ އެވެ.

"ސިންގަމް އަގެއިން"ގައި އަޖޭ ދޭވްގަން، ޓައިގާ ޝްރޮފް، ދީޕިކާ ޕަދުކޯން ފަދަ ތަރިން ފެނިގެންދާއިރު "ބޫލް ބުލައްޔާ 3"ގައި ފެންނާނީ ކާތިކް އާރްޔަންގެ އިތުރުން ވިދްޔާ ބާލަންއާއި މަދޫރީ ޑިކްސިޓް އެވެ.