ގިނަބައެއްގެ މަގުބޫލުކަން ލިބިފައިވާ ބޮލީވުޑްގެ މަޝްހޫރު ތަރި އާމިރު ޚާންގެ ކުރީގެ އަންހެނުން ކިރަން ރާއޯއަކީ އެކަނިވެރި މައެއްގެ ގޮތުގައި އޭނާ ސިފަކޮށްފި އެވެ.

ކަރީނާ ކަޕޫރުގެ ޗެޓް ޝޯ "ވަޓް ވުމަން ވޯންޓް"އަށް ދިން އިންޓަވިއުއެއްގައި ކިރަން ވަނީ އޭނާއާއި އާމިރުގެ ކައިވެނި ރޫޅުމަށްފަހު އެމީހުންގެ ދަރިފުޅު އާޒާދު ރާއޯ ޚާން ބެލުމުގެ ކަންކަން ކުރިއަށް ގެންދާ ގޮތާ ބެހޭގޮތުން ވާހަކަ ދައްކާފަ އެވެ.

އެގޮތުން ކިރަން ބުނީ އާމިރު އުޅެން ޖެހޭލެއް ބުރަކަމުން ދަރިފުޅަށް ދޭންޖެހޭ ވަގުތު އޭނާއަށް ނުދެވޭ ކަމަށާއި އެހެންކަމުން އޭނާއަކީ އެކަނިވެރި މައެއްގެ ގޮތުގައި ބުނެވިދާނެ ކަމަށެވެ.

އޭގެ އިތުރުން ވެސް ކިރަން ވަނީ އާމިރުއަށް ދަރިފުޅުގެ އެއްވެސް ކަމެއް ނޭނގޭ ކަމަށާއި ހާއްސަކޮށް ދަރިފުޅުގެ ސްކޫލުގެ ކަންކަމުގައި އާމިރުގެ ބައިވެރިވުން ވަރަށް ކުޑަ ކަމަށް ބުނެފަ އެވެ.

"އަހަރުމެން ކައިވެނި ކޮށްގެން އުޅުނުއިރު ވެސް އާޒާދު ބެލުމުގެ ގިނަ ކަންކަން ކުރަނީ އަހަރެން. އެކަމަކު މިހާރަށްވުރެ އޭރު ފަސޭހަ" ކިރަން ބުންޏެވެ.

2005 ވަނަ އަހަރު ކައިވެނިކުރި ކިރަންއާއި އާމިރުގެ ކައިވެނި ރޫޅުނީ 16 އަހަރަށްފަހު 2021ގަ އެވެ. އެ ދެމީހުންގެ ދަރިފުޅު އާޒާދު އުފަންވީ 2011 ވަނަ އަހަރު އެވެ.