2025 ވަނަ އަހަރަށް ހުށަހެޅިފައިވާ ދައުލަތުގެ ބަޖެޓު ދިރާސާކުރުމުގެ މަސައްކަތް މި މަހުގެ 20 ވަނަ ދުވަހުގެ ކުރިން ނިންމުމަށް ރައްޔިތުންގެ މަޖިލީހުގެ ބަޖެޓު ކޮމިޓީން ނިންމައިފި އެވެ.

މިއަދުގެ ބައްދަލުވުމުގައި ބަޖެޓު ކޮމިޓީގެ މުޤައްރިރުކަމަށް ފުވައްމުލަކު މެދު ދާއިރާގެ މެންބަރު ޢަލީ ފަޒާދު ހަމަޖައްސާފައިވާއިރު، ނައިބު މުޤައްރިރުކަމަށް ހޮވީ އޭދަފުށި ދާއިރާގެ މެންބަރު އަޙްމަދު ސަލީމް އެވެ. ބަޖެޓު ކޮމިޓީގެ މިއަދުގެ ޖަލްސާގައި ބަޖެޓު ދިރާސާކުރުމުގެ މަސައްކަތްތައް ކުރިއަށް ގެންދާނެ ގޮތުގެ ތާވަލެއް އެކުލަވާލާފައިވެ އެވެ.

ކޮމިޓީން ކުރުމަށް ނިންމި މަސައްކަތްތަކުގެ ތެރޭގައި، އޮޑިޓާ ޖެނެރަލްގެ އޮފީހާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބަޖެޓާ ގުޅޭ ބަޔާން ހޯދުމަށް ނިންމާފައިވެ އެވެ. އަދި މިނިވަން މުއައްސަސާތަކާއި ސަރުކާރުގެ އެކި އޮފީސްތަކުގެ ބަޖެޓުގެ ތަފްސީލު ހޯދުމަށްޓަކައި އެ އިދާރާތަކަށް ލިޔުމަށްވެސް ވަނީ ނިންމާފަ އެވެ.

2025 ވަނަ އަހަރަށް ލަފާކޮށް މިނިސްޓްރީ އޮފް ފިނޭންސްއިން ހުށަހަޅުއްވާފައިވާ ބަޖެޓުގެ މަސައްކަތް ކުރިއަށް ގެންދާނެ ގޮތާމެދު ބަޖެޓު ދިރާސާކުރާ ކޮމިޓީން މަޝްވަރާކުރުން --- ފޮޓޯ: މަޖިލިސް

ފާއިތުވި ހަފުތާގެ ބުރާސްފަތި ދުވަހު މަޖިލީހަށް ހުށަހެޅުނު 2025 ވަނަ އަހަރަށް ލަފާކުރާ ބަޖެޓުގެ ޖުމްލަ އަދަދަކީ 57 ބިލިއަން ރުފިޔާ އެވެ. މި ބަޖެޓުގައި އާމްދަނީގެ ގޮތުގައި ލިބޭނެ ކަމަށް ލަފާކޮށްފައިވަނީ 39.8 ބިލިއަން ރުފިޔާ އެވެ.