ހޮލީވުޑްގެ މަޝްހޫރު ތަރި އެރިއާނާ ގްރާންޑޭ އޭނާގެ ނަން ބަދަލުކޮށް އޭނާގެ އެންމެ ފަހު ފިލްމުގައި އެނަން އާއްމުކޮށް ދައްކާލައިފި އެވެ.

ފިލްމު "ވިކެޑް"ގެ ކްރެޑިޓްސްގައި އެރިއާނާ އޭނާގެ ނަން ބޭނުން ކޮށްފައިވަނީ "އެރިއާނާ ގްރާންޑޭ ބުއޭރްޓޯ"ގެ ގޮތުގަ އެވެ. އެ ފިލްމުގެ ފެށުމުގައާއި ނިމުމުގައި ވެސް އޭނާގެ ނަން އެހެން ދައްކާފައިވެ އެވެ.

އެރިއާނާގެ އުފަން ނަމަކީ އެރިއާނާ ގްރާންޑޭ ބުއޭރްޓޯ އެވެ. އެއީ އޭނާގެ މަންމަގެ ނަމާއި ބައްޕަގެ ނަން ގުޅުވައިގެން ދީފައިވާ ނަމެކެވެ.

ހޮލީވުޑްގައި މަޝްހޫރު ވުުމުގެ ކުރިން އެރިއާނާއާއި އޭނާގެ ބައްޕައާ ދެމެދު ޖެހުނު މައްސަލައެއްގެ ފަހުން އެރިއާނާ ވަނީ އޭނާގެ ނަމުން ބައްޕަގެ ނަން ކަމަށްވާ "ބުއޭރްޓޯ" އުނިކޮށްފަ އެވެ.

އެހެން ނަމަވެސް މިފަހުން އޭނާގެ ބައްޕައާއި ސުލްހަވެ އެ ދެމީހުންގެ ގުޅުން ކޮންމެވެސް ވަރަކަށް ރަނގަޅުވެފައިވާއިރު އެރިއާނާގެ ނަން އަލުން އުފަން ނަމަށް ބަދަލުކުރީ އެހެންވެ ކަމަށް ބެލެވެ އެވެ.

އެރިއާނާގެ އެންމެ ފަހުގެ ފިލްމު "ވިކެޑް" މިހާރު ސިނަމާތަކުގައި ދައްކަމުން އަންނައިރު ގިނަ ބައެއްގެ ތަރުހީބު އެ ފިލްމަށް އަންނަނީ ލިބެމުންނެވެ.