މެތިއު ޕެރީއާއި މެޓް ލެ ބްލޭންކްއަކީ ހޮލީވުޑްގައި އެކުގައި މަސައްކަތްކުރި ވަރަށް ގާތް ދެ އެކުވެރިންނެވެ. 1994 ން 2004 އަކަށް ކުރިއަށްދިޔަ ސީރީޒް "ފްރެންޑްސް"ގައި އެ ދެމީހުން އެކުގައި ފެނިގެންދިޔަ އެވެ.

އެހެންކަމުން މިދިޔަ އަހަރުގެ އޮކްޓޯބަރު މަހު މެތިއު މަރުވުން ވެގެންދިޔައީ މެޓްއަށް ފުން އަސަރުތަކެއް ކުރުވި ކަމަކަށެވެ. ބުނެވޭ ގޮތުގައި މެތިއުގެ މަރަށްފަހު މެޓް ވަނީ އޭނާގެ ދިރިއުޅުމަށް ބޮޑެތި ބަދަލުތަކެއް ގެނެސްފަ އެވެ.

އެގޮތުން މިފަހަކަށް އައިސް މެޓް މަޝްހޫރުކަމާއި މީޑިއާއާ ދުރުވެލައި ސިއްރު ދިރިއުޅުމެއް އުޅެމުން އަންނަ ކަމަށް ހަބަރުތައް ބުނެ އެވެ.

އެއާއެކު ރާ ބުއިން ފަދަ ނޭދެވޭ އާދަތަކުން ދުރުވާން ވެސް އޭނާ މަސައްކަތް ކުރަމުން އަންނަ ކަމަށްވެ އެވެ. މީގެ އިތުރުން މެތިއުއާ ހިލާފަށް މަސްތުވާތަކެތީގެ ވަބާގައި ނުޖެހި އުޅެވޭތޯ އޭނާ އަންނަނީ ގަދައަޅާ މަސައްކަތް ކުރަމުންނެވެ.

މެތިއު މަރުވެފައި އޮއްވާ ފެނުނީ އޭނާ ދިރިއުޅެމުން ދިޔަ ގޭގެ ފާހާނާގެ ބިލިގާއެއްގެ ތެރޭގައި އޮއްވައި މިދިޔަ އަހަރުގެ އޮކްޓޯބަރު މަހުގެ 30 ވަނަ ދުވަހު އެވެ.

އޭނާގެ މަރާ ގުޅިގެން ކުރެވުނު ތަހުގީގުތަކުން އޭނާގެ ހަށިގަނޑުގައި މަސްތުވާތަކެތީގެ އަސަރު ހުރިކަން ވަނީ އެނގިފަ އެވެ. މެތިއު ވަނީ އޭނާގެ ހަޔާތުގެ ގިނަ އަހަރުތަކެއް މަސްތުވާތެކެތީގެ ވަބާގައި ހޭދަކޮށްފަ އެވެ.