ޖައްވީ ސައިންސްއަށް އަންނަމުންދާ އިންގިލާބީ ބަދަލުތަކުގެ ތެރެއިން ލަކުޑިން ހަދާފައިވާ އެންމެ ފުރަތަމަ ސެޓެލައިޓް މިދިޔަ އަންގާރަ ދުވަހު ޖައްވަށް ފޮނުވާލައިފި އެވެ.

ޖަޕާނުގެ ކިޔޯޓޯ ޔުނިވާސިޓީގެ ދިރާސާވެރިން އުފައްދާފައިވާ "ލިގްނޯސެޓް" ނަމަކަށް ކިޔާ އެ ސެޓެލައިޓް ބައިނަލްއަގްވާމީ ޖައްވީ ސްޓޭޝަނަށް ދިއުމަށްފަހު ދުނިޔެއާ 400 ކިލޯމީޓަރު ދުރުން އޯބިޓަށް ދޫކޮށްލެވޭނެ އެވެ.

އިންސާނެއްގެ އަތްތިލައިގެ ސައިޒުގެ އެ ސެޓަލައިޓް ޖައްވަށް ފޮނުވީ ޖައްވުގައި އިންސާނުންގެ އާބާދީ އާލާކުރަން ބޭނުންވާ ބައެއް ކަންތައްތައް ހޯދާ ދިރާސާ ކުރުމަށެވެ.

އާއްމު ގޮތެއްގައި ޖައްވަށް ފޮނުވާލެވޭ ސެޓެލައިޓްތައް އުފައްދާފައި ހުންނަނީ ދަގަނޑުން ނަމަވެސް ލަކުޑިން ހަދާފައިވާ ސެޓެލައިޓްއަކީ ވެސް އޭގެ މަސައްކަތް ފުރިހަމައަށް ކުރާނެ ސެޓެލައިޓްއެއް ކަމަށް ސައިންސްވެރިން ބުނެ އެވެ.

ކިޔޯޓޯ ޔުނިވާސިޓީގެ ދިރާސާވެރިއެއް ކަމަށްވާ ޓަކައޯ ޑޮއި ވިދާޅުވީ ލަކުޑިން ހަދާފައިވާ ސެޓެލައިޓެއް ޖައްވަށް ފޮނުވުމުގެ ބޭނުމަކީ ލަކުޑިން ހަދާފައިވާ ތަކެތި ޖައްވުގައި ގެންގުޅެވޭނެ ކަން ސާބިތުކޮށްދިނުން ކަމަށާއި އެކަމުން އިންސާނީ އާބާދީއަށް ފަސޭހަ ވާނެކަން ދެއްކުން ކަމަށެވެ.

ދުނިޔެއާ އަޅާބަލާއިރު ޖައްވުގައި މާ ގިނަ ދުވަސް ވަންދެން ލަކުޑި ހުންނާނެ އެވެ. ސަބަބަކީ ޖައްވުގައި ފެނާއި އޮކްސިޖަން ނުހުންނާތީ އެވެ.

މީގެ އިތުރުން ވެސް ލަކުޑިން ސެޓެލައިޓް ހެދުމަކީ އޭގެ ސަބަބުން ތިމާވެށްޓަށް ކުރާ ނޭދެވޭ އަސަރު ވެސް ކުޑަވާނެ ކަމެއް ކަމަށް ސައިންސްވެރިން ބުނެ އެވެ.