ހޮލީވުޑްގެ މަޝްހޫރު ތަރި ލިއޮނާޑޯ ޑިކެޕްރިއޯގެ އުމުރުން 50 އަހަރު ފުރުން ފާހަގަ ކުރުމުގެ ގޮތުން ކުލަގަދަ ހަފްލާއެއް ބާއްވައިފި އެވެ.

އެގޮތުން ލިއޮނާޑޯ ވަނީ އޭނާގެ ހޮލީވުޑް ރަހުމަތްތެރިންނަށް "އުމުރާ ގުޅޭ" ކަހަލަ ހަފްލާއެއް ބާއްވާފައި ކަމަށް ހަބަރުތައް ބުނެ އެވެ.

މިދިޔަ ހޮނިހިރު ދުވަހު ލޮސް އެންޖަލެސްގައި އޭނާ ދިރިއުޅެމުން އަންނަ ގޭގައި ލިއޮނާޑޯ ބޭއްވި އެ ހަފްލާގައި ހޮލީވުޑްގެ މަޝްހޫރު ފަންނާނުންތަކެއް އައިސްފައިވެ އެވެ.

އެ ހަފްލާގެ ތެރެއިން ފެނުނު ބައެއް މަޝްހޫރު މޫނުތަކުގެ ތެރޭގައި ބްރެޑް ޕިޓް، މާކް ރަފަލޯ އަދި ސްޓީވަން ސްޕިންބާގް ހިމެނެ އެވެ.

މީގެ އިތުރުން ވެސް ހޮލީވުޑްގައި ލިއޮނާޑޯއާއެކު މަސައްކަތް ކޮށްފައިވާ ގިނަ އެކްޓަރުންނާއި ޑައިރެކްޓަރުން ވެސް އެ ހަފްލާއިން ފެނިގެން ގޮސްފައިވެ އެވެ.

1974 ވަނަ އަހަރު އުފަންވި ލިއޮނާޑޯއަށް 50 އަހަރު ފުރުނީ އިއްޔެ އެވެ. އެހެން ނަމަވެސް އޭނާ ވަނީ އޭގެ ދެ ދުވަސް ކުރިން އުފަން ދުވަހުގެ ހަފްލާ ބާއްވާފަ އެވެ.

ލިއޮނާޑޯ މަޝްހޫރު ވެފައިވަނީ ހޮލީވުޑްގެ ކްލެސިކްއެއް ކަމަށްވާ "ޓައިޓޭނިކް"ގައި ކޭޓް ވިންސްލެޓްއާއެކު އޭނާ ދައްކުވައިދިން ރޯލުންނެވެ.