ހޮލީވުޑްގެ ހަބަރުތަކުގައި މިވަގުތު އެންމެ ގަދައަށް ދެކެވެމުން އަންނަ އެއް ވާހަކައަކީ ޖެނިފާ ލޮޕޭޒްއާއި ބެން އެފްލެކްގެ ވަރީގެ ވާހަކަ އެވެ.

އެ ދެމީހުންގެ ކައިވެނި ރޫޅި ވަރީގެ މައްސަލަ ފެށުނު ފަހުން ފުރަތަމަ ފަހަރަށް ޖެނިފާ މިވަނީ އޭނާގެ ވަރިއާ ބެހޭގޮތުން ވާހަކަ ދައްކާފަ އެވެ.

ޖެނިފާގެ ކުރިއަށް އޮތް ފިލްމު "އަންސްޓޮޕަބަލް"ގެ ޕްރޮމޯޝަނަލް އިވެންޓެއްގައި ވާހަކަ ދައްކަމުން ޖެނިފާ ބުނީ ފިލްމުތަކުގައި އޭނާ ދައްކުވައިދޭ ކެރެކްޓަރުތަކަށް ހިތްވަރު ލިބިދެނީ އޭނާގެ ޒާތީ ދިރިއުޅުމުން ކަމަށެވެ.

އެގޮތުން އުނދަގޫ، ގޮންޖެހުންތައް ގިނަ ގުޅުންތަކުން އޭނާ އިބުރަތް ލިބިގަންނަ ކަމަށާއި އެކަމުން ފިލްމުތަކުގައި އެކްޓް ކުރަން ފަސޭހަވާ ކަމަށް ޖެނިފާ ބުންޏެވެ.

"އަންސްޓަޮޕަބަލް"ގައި އޭނާ ދައްކުވައިދޭން ޖެހުނު ރޯލަކީ ވަރަށް "ވަރުގަދަ" ރޯލެއް ކަމަށާއި އޭނާގެ ޒާތީ ތަޖުރިބާތަކުން އެ ކެރެކްޓަރަކަށް އިތުރު މުއްސަނދި ކަމެއް ލިބިފައިވާ ކަމަށް ވެސް އޭނާ ބުންޏެވެ.

ދެ އަހަރު ދުވަހު ކައިވެނި ކޮށްގެން އުޅުމަށްފަހު ބެންއާއި ޖެނިފާ ވަރިވާން ހުށައަޅާފައިވާއިރު ވަރީގެ ސަބަަބަކަށް އެ ދެމީހުން ބުނެފައިވަނީ "ހައްލު ނުކުރެވޭ ފަދަ ތަފާތު" ތަކެއް ހުރުމެވެ.

ބެންގެ ކުރިން ވެސް ޖެނިފާ ތިން ކައިވެންޏެއް ކޮށްފައިވާއިރު އެ ތިން ކައިވެނި ވެސް ނިމިގެން ގޮސްފައިވަނީ ވަރަށް ހަޑި ގޮތަކަށެވެ.