ގިނަ ބައެއްގެ ލޯބި ހޯދާފައިވާ ބޮލީވުޑްގެ މަޝްހޫރު ތަރި އާމިރު ޚާން ބޮލީވުޑް ދޫކޮށްލަން ގަސްދުކުރި ސަބަބާއި އެ ނިންމުން ދޫކޮށްލި ސަބަބު ވެސް މީޑިއާއަށް ހާމަކޮށްފި އެވެ.

ހޮލީވުޑް ރިޕޯޓަރ އިންޑިއާއަށް ދިން އިންޓަވިއުއެއްގައި އާމިރު ބުނީ ފިލްމީ ދާއިރާއިން ދުރަށް ދާން ނިންމީ އެ ދާއިރާގެ މައްސަލައެއްގެ ސަބަބުން ނޫން ކަމަށާއި އޭނާގެ ޒާތީ ސަބަބުތަކެއްގެ ސަބަބުން ކަމަށެވެ.

އެގޮތުން 35 އަހަރު ދުވަހު ބޮލީވުޑްގައި އުޅެވުނުއިރު އޭނާގެ އާއިލާއަށް އެކަށީގެންވާ ވަރަށް ވަގުތު ނުދެވޭކަން އިހުސާސްވީ ކޮވިޑް 19ގެ ތެރެއިން ކަމަށް އޭނާ ބުންޏެވެ.

"އަހަރެންގެ އާއިލާއާއި އަނބިންނާއި ދަރިންނަށް ވެސް ރަނގަޅަށް ވަގުތެއް ނުދެވޭ. ރީނާއާ ކައިވެނި ކޮށްގެން އުޅުނުއިރު ވެސް އަދި ކިރަންއާއެކު އުޅުނުއިރު ވެސް،" އާމިރު ބުންޏެވެ.

އެކަން އެގޮތަށް އިހސާސް ވުމުން ދިރިއުޅުމުގެ ފަހުބައި އާއިލާއަށް ދޭން ގަސްދުކުރީ ކަމަށް އާމިރު ބުނެފައިވެ އެވެ. އެ ނިންމުން އޭނާ ނިންމީ ލާލް ސިންހް ޗައްދާގެ ވެސް ކުރިން ކަމަށް އޭނާ ފާހަގަކުރި އެވެ.

އެހެން ނަމަވެސް އެ ނިންމުން ބަދަލުކުރަން އޭނާއަށް ވިސްނައިދިނީ އޭނާގެ ދަރިން ކަމަށްވާ ޖުނައިދު ހާންއާއި އީރާ ޚާން ކަމަށް އާމިރު ބުންޏެވެ.

"އަހަރެންގެ ދަރިން އަހަންނަށް ނަސޭހަތްތެރިވީ އެއްވެސް ކަމަކަށް ގޮސް ހުސް ނުވެ މެދު މިން އިހުތިޔާރު ކުރަން،" އާމިރު ބުންޏެވެ.

އާމިރުގެ ފިލްމީ މަސައްކަތްތަކަށް ބަލާލާއިރު އޭނާ އެންމެ ފަހުން ފެނިގެން ގޮސްފައިވަނީ ތާރީހީ ފިލްމެއް ކަމަށްވާ "ލާލް ސިންހް ޗައްދާ" އިންނެވެ.