ސިފައިންނާއި ފުލުހުންނަށް މިހާރު ލިބެމުން އަންނަ އެއްވެސް ލިމިޓެއް ނެތް މެޑިކަލް ސްކީމް އުވާލުމަށްފަހު ޕްރައިވެޓް އިންޝުއަރެންސް ސްކީމަކަށް ބަދަލުކުރުމަށް ސަރުކާރުން ނިންމައިފި އެވެ.

މި ބަދަލު ގެންނަކަން ހާމަކޮށްފައި ވަނީ އަންނަ އަހަރަށް ލަފާ ކުރާ ބަޖެޓުގެ ތަފްސީލީ ފޮތުގަ އެވެ.

ފިނޭންސް މިނިސްޓްރީ އިން ބުނި ގޮތުގައި މިހާރު މި ސްކީމް ބައްޓަންކޮށްފައި ވަނީ ސްކީމްގެ ނާޖާއިޒު ފައިދާ ނެގޭނެ ގޮތަށެވެ. އެގޮތުން މެޑިކަލް ސްކީމް އާއި އާސަންދައިން އެއް ޚިދުމަތަކަށް އެކީ އެއްފަހަރާ މިހާރު ނެގެ އެވެ. އަދި ކޮންމެހެން ބޭނުންނުވާ ކޮސްމެޓިކް ޕްރިސީޖާތަކަށް ވެސް މިހާރު މެޑިކަލް ސްކީމް ބޭނުންކުރެވެ އެވެ.

"މިކަންކަމުގެ ސަބަބުން އިސްރާފު އިތުރުވެ، އެންމެ ބޭނުން ޖެހިފައިވާ ފަރާތްތަކަށް ސަރުކާރުން ފޯރުކޮށްދޭން ޖެހޭ އެހީތެރިކަން އެކަށީގެންވާ މިންވަރެއްގައި ފޯރުކޮށްދިނުމަށް ދަތިވެ، އިޖުތިމާއީ ރައްކާތެރިކަން ގާއިމުކުރުމުގެ މަގުސަދުތަކާ ފުށުއަރާ،" ފިނޭންސް މިނިސްޓްރީން ބުންޏެވެ.

މި އަހަރުގެ ނިޔަލަށް ސިފައިންނާއި ފުލުހުންގެ މެޑިކަލް ސްކީމަށް 321 މިލިއަން ރުފިޔާ ހަރަދުވާނެ ކަމަށް ފިނޭންސުން ވަނީ ލަފާކޮށްފަ އެވެ. މި ބޮޑު ހަރަދު ކޮންޓްރޯލް ކުރުމަށް ސިފައިންނާއި ފުލުހުންގެ އިތުރުން އެ މީހުންގެ އާއިލާތަކަށް އެއްހަމަކޮށް، ޕްރައިވެޓް އިންޝުއަރެންސް ޕެކޭޖެއް ހަމަޖައްސާނެ ކަމަށް ފިނެންސުން ވަނީ ބުނެފަ އެވެ.

އެ މިނިސްޓްރީން ބުނީ މި ބޮޑު ބަދަލު އަންނަ އަހަރުގެ ކުރީކޮޅުން ފެށިގެން ގެނައުމަށް ނިންމާފައިވާ ކަމަށެވެ.