ކާޑޭޝަން އާއިލާއަށް ނިސްބަތްވާ މަޝްހޫރު މޮޑެލް އަދި އިންފްލުއެންސާ ކިމް ކާޑޭޝަންއަކީ އެކަނިވެރި މައެއްގެ ގޮތުގައި އޭނާ ސިފަކޮށްފި އެވެ.

ކިމްގެ އެންމެ ގާތް ރަހުމަތްތެރިޔާ ޒޯއީ ވިންކްލާގެ ޕޮޑްކާސްޓެއްގައި ވާހަކަ ދައްކަމުން ކިމް ބުނީ އޭނާގެ ހަތަރު ދަރިންގެ ބައްޕަ ހުރި ނަމަވެސް އޭނާއަކީ އެކަނިވެރި މައެއްގެ އިހުސާސް ކުރެވޭ ކަމަށެވެ. އެގޮތުން ކުދިންގެ ބައްޕަ ކާންޔޭ ވެސްޓް އެ ކުދިންނާ ބައްދަލު ނުކުރާތާ ދެ މަސް ވާން ކައިރިވެފައިވާ ކަމަށް ވެސް ކިމް ބުނެފައިވެ އެވެ.

ކިމް މި ބީދައިން ވާހަކަ ދައްކާފައި މިވަނީ ކާންޔޭގެ މިހާރުގެ އަންހެނުން ކަމަށް ބެލެވޭ ބިއަންކާ ސެންސޯރީއާއެކު ޖަޕާނުގައި ދުވަސްތައް ހޭދަކުރަމުން ދާ ދަނޑިވަޅެއްގަ އެވެ.

ކިމް އިތުރަށް ބުނެފައިވަނީ ދަރިން ތަރުބިއްޔަތު ކުރުމުގެ ވާހަކައަކީ އޭނާ ވަރަށް ނުދައްކާ ވާހަކައެއް ކަމަށާއި ސަބަބަކީ އެކަމަށްޓަކައި މީހުން އޭނާއަށް ފާޑުކިޔާތީ ކަމަށެވެ.

2021 ވަނަ އަހަރު ވަކިވި ކާންޔޭއާއި ކިމްއަށް ހަތަރު ކުދިން ލިބިފައިވެ އެވެ. އެއީ ނޯތު ވެސްޓް، ޗިކާގޯ ވެސްޓް، ސެއިންޓް ވެސްޓް އަދި ސާމް ވެސްޓް އެވެ.