ދުނިޔެއަށް އާދެވޭނެ ގޮތެއް ނެތި ޖައްވުގައި "ތާށިވެފައި" ތިބި ސައިންސްވެރިންގެ ސިއްހަތާމެދު ސިއްހީ މާހިރުން ކަންބޮޑުވުން ފާޅުކޮށްފި އެވެ.

ނިއު ޖާޒީގެ ޑޮކްޓަރެއް ކަމަށްވާ ޑރ، ޑޭވިޑް ޝޭކާ މި ކަންބޮޑުވުން ފާޅުކޮށްފައިވަނީ ތާށިވެފައި ހުރި ސައިންސްވެރިއެއް ކަމަށްވާ ސުނީތާ ވިލިއަމްސްގެ ފޮޓޯއެއް އާއްމުވުމުންނެވެ.

އެ ފޮޓޯގައި ސުނީތާގެ ހަށިގަނޑު ވަރަށް ބޮޑަށް ހިކި އަނަރޫފަ ވެފައިވާކަން ފާހަގަ ކުރެވޭއިރު ހަށިގަނޑާ އަޅާ ބަލާއިރު ބޯ ވެސް ބޮޑުކަން ފާހަގަވެ އެވެ.

މި ފޮޓޯތަކާއެކު އާއްމުން ކަންބޮޑުވުން ފާޅު ކުރަން ފެށުމުން ސުނީތާ ވަނީ އެ ބަދަލު ފެންނަ ސަބަބަކީ ޖައްވުގައި ދަމާބާރު ނެތުމުގެ ސަބަބުން ހަށިގަނޑުގައި ދައުރުވާ ލޭ ބޮލަށް ޖަމާވުން ކަމަށް ބުނެފަ އެވެ.

އެހެން ނަމަވެސް ޑރ. ޑޭވިޑް ބުނެފައިވަނީ ބޮލަށް ލޭ ޖަމާވުމަކީ މީހާގެ ހަށިގަނޑު ހިކި އަނަރޫފަވާނެ ކަމެއް ނޫން ކަމަށެވެ. ހަށިގަނޑު ހިކިފައި ވަނީ ރަނގަޅު ކާނާ ނުލިބުމުގެ ސަބަބުން ކަމަށް ވެސް އޭނާ ބުންޏެވެ.

އެއާއެކު އެ ހާލަތުގައި ތިބޭއިރު އެންޒައިޓީއާއި ޑިޕްރެޝަން ފަދަ ނަފްސާނީ މައްސަލަތައް ވެސް ކުރިމަތިވުން ގާތް ކަމަށާއި އެކަންކަމުންވެސް ހަށިގަނޑަށް ބޮޑެތި ބަދަލުތަކެއް އަންނާނެ ކަމަށް ޑރ. ޑޭވިޑް ފާހަގަކުރި އެވެ.

ސުނީތާގެ އިތުރުން އެހެން އެސްޓްރޮނޯޓެއް ކަމަށްވާ ބަޗް ވިލްމޯ ޖައްވަށް ދަތުރު ފެށީ ބޮއެންގްގެ ސްޓާލައިނާ އުޅަނދެއްގައި މިދިޔަ ޖޫން މަހު އެވެ.

އެހެން ނަމަވެސް ދަތުރުކުރި އުޅަނދުގައި މައްސަލަ ޖެހި ރޭވުމާ އެއްގޮތަށް ދުނިޔެއަށް އާދެވިފައިނުވާއިރު އެ މީހުން އެނބުރި ގެންނަން އިތުރު ފަސް މަސް ދުވަސް ހޭދަވާނެ ކަމަށް ނާސާއިން އޮގަސްޓް މަހު ހާމަކޮށްފައިވެ އެވެ.