އެމެރިކާގެ ރިޔާސީ އިންތިހާބު ކާމިޔާބު ކުރެއްވި ޑޮނަލްޑް ޓްރަމްޕްގެ ކެބިނެޓާއި މެދު އޭނާ ވެރިކަމަށް ގެނައުމަށް ތާއީދުކުރި އެމެރިކާގެ މުސްލިމު ލީޑަރުން ނުރުހުން ވެއްޖެ އެވެ.

މުސްލިމު ސަޕޯޓަރުންގެ ސަބަބުން ރައީސް ޓްރަމްޕަށް މިޗިގަން ފަދަ ގިނަ ސްވިންގް ސްޓޭޓްތަކެއް ކާމިޔާބު ކުރެވުނުކަމަށް އެމެރިކާގެ މުސްލިމު ލީޑަރުން ބުނެ އެވެ.

ނަމަވެސް ޓްރަމްޕްގެ އާ ކެބިނެޓް އެކުލަވާލުމުގައި ހޮވާފައިވަނީ މުޅިންވެސް "ޕްރޯ-އިޒްރޭލު" މީހުންކަމަށް މުސްލިމުން ބުނެ އެވެ.

އެގޮތުން ސެކްރެޓަރީ އޮފް ސްޓޭޓަކަށް ހޮއްވެވި ރިޕަބްލިކަންގެ ސެނެޓާ މާކޯ ރުބިއޯ އަކީ އިޒްރޭލަށް ވަރަށް ބޮޑަށް ތާއީދުކުރާ މީހެކެވެ. މިއަހަރު ކުރީކޮޅު ރުބިއޯ ވަނީ ޣައްޒާގައި އިޒްރޭލުން ކުރަމުންދާ ހަނގުރާމަ ހުއްޓާލުމާއި ދެކޮޅުކަމާއި ހަމާސް އެއްކޮށް ނައްތާލަން އިޒްރޭލުން ޖެހޭކަމަށް ބުނެފަ އެވެ.

މީގެ އިތުރުން ޓްރަމްޕްގެ ކެބިނެޓްގައި ހިމެނުމަށް ނިންމާފައިވާ އާކަންސަސްގެ ކުރީގެ ގަވަރުނަރު މައިކް ހަކަބީ އަކީ ވެސް "ޕްރޯ އިޒްރޭލު" ވިސްނުމުގެ ބޭފުޅެކެވެ. އޭނާ ވަނީ އިޒްރޭލުން ފަލަސްތީނުގެ ވެސްޓް ބޭންކް ހިފުމަށް ހިތްވަރުދީ ފަލަސްތީނުގައި ދެ ސްޓޭޓް އޮންނަން ޖެހޭ ކަމަށް ބުނެފަ އެވެ.

އެމެރިކާއިން އދ އަށް ކަނޑައަޅާ އެމްބަސަޑަރުކަމަށް ހަމަޖައްސާ ރިޕަބްލިކަން ޕާޓީގެ މަންދޫބު އެލީސް ސްޓެފާނީ ވެސް ވަނީ މީގެ ކުރިން އިޒްރޭލު މައްސަލައިގައި އދ އަށް ވަރަށް ބޮޑަށް ފާޑުކިޔާފަ އެވެ. މީގެ އިތުރުންވެސް ކެބިނެޓަށް ހަމަޖެއްސި ގިނަ ބޭފުޅުންނަކީ އިޒްރޭލަށް ތާއީދުކުރާ ބޭފުޅުންކަމަށް މުސްލިމު ލީޑަރުން ބުނެ އެވެ.

ޓްރަމްޕަށް ތާއީދުކޮށް ވޯޓް ހޯދުމުގައި އިސްކޮށް އުޅުނު އެމެރިކާގެ މުސްލިމު ލީޑަރެއް ބުނީ ގިނަ މުސްލިމުން ޓްރަމްޕަށް ވޯޓް ލީ ޓްރަމްޕްގެ ކެބިނެޓަށް މީހުން ނެންގެވުމުގައި ސުލްހައަށް މަސައްކަތް ކުރާނެ މީހުން ހަމަޖައްސަވާނެކަމަށް ދެކިގެން ކަމަށެވެ. ނަމަވެސް އެފަދަ އެއްވެސް ކަމެއް ނުފެންނަކަމަށް އޭނާ ބުންޏެވެ.

"މުޅިންވެސް މި ފެންނަނީ ވަރަށް ބޮޑަށް އިޒްރޭލަށާއި ހަނގުރާމައަށް ތާއީދުކުރާ "ޕްރޯ އިޒްރޭލް" މީހުން، އެއީ ސުލްހައާއި ހަނގުރާމައާއި ދެކޮޅަށް މަސައްކަތް ކުރުމުގައި ރައީސް ޓްރަމްޕްގެ ފެއިލްވުމެއް" އޭނާ ބުންޏެވެ.

މުސްލިމު ލީޑަރުން ބުނީ ޣައްޒާގައި ހިނގަމުންދާ ހަނގުރާމަ ހުއްޓާލުމަށް ގޮވާލުމުގައި ދެމި ތިބޭނެކަމަށެވެ.