ބ. އޭދަފުށީގައި 1،000 ހައުސިން ޔުނިޓް އަޅަން ޗައިނާގެ ސިނޯހައިޑްރޯ ކޯޕަރޭޝަންނާ އެކު އެގްރީމަންޓުގައި މިއަދު ސޮއިކޮށްފި އެވެ.

ރައީސް އޮފީހުގައި ބޭއްވި ރަސްމިއްޔާތެއްގައި ސަރުކާރުގެ ފަރާތުން ސޮއި ކުރެއްވީ މިނިސްޓަރު އަބްދުﷲ މުއްތަލިބު އެވެ. އަދި ސިނޯހައިޑްރޯ ކުންފުނީގެ ފަރާތުން ސޮއިކުރެއްވީ އެ ކުންފުނީގެ ކަންޓްރީ މެނޭޖާ ޕޭން ގުއާންޒޯ އެވެ.

މިނިސްޓަރު މުއްތަލިބު ވިދާޅުވީ 1000 ހައުސިން ޔުނިޓް އެޅުމުގެ މަޝްރޫއުގެ ދަށުން އޭދަފުށީގައި 15 ބުރީގެ 12 ޓަވަރު އަޅާނެ ކަމަށާއި އެގޮތަށް ނިންމީ އެ ރަށަށް ބިން އިތުރު ކުރެވެން ނެތުމުން އެންމެ ރަނގަޅު ގޮތުގައި ބިން ބޭނުން ކުރުމަށް ކަމަށެވެ.

މަޝްރޫއުގެ ދަށުން ތިން ކޮޓަރީގެ 336 ފްލެޓާއި ދެ ކޮޓަރީގެ 772 ފްލެޓް އެޅުމަށް ނިންމާފައިވާ ކަމަށް މިނިސްޓަރު ހާމަކުރެއްވި އެވެ. މަޝްރޫއު ކުރިއަށް ގެންދަން ބޭނުންވާ ފައިސާ އަންނަ އަހަރު ތެރޭގައި ހަމަޖެހި މަސައްކަތް ފެށިގެންދާނެ ކަމަށް އުއްމީދު ކުރައްވާ ކަމަށް މުއްތަލިބު ވިދާޅުވި އެވެ.