މި އަހަރުގެ މިސް ޔުނިވާސް އަށް ޑެންމާކުގެ ވިކްޓޯރިއާ ހޮވިއްޖެ

މިއަދު އޮތް މިސް ޔުނިވާސްގެ ފައިނަލް ކޮމްޕެޓިޝަންގައި ވިކްޓޯރިއާ ވަނީ މިސް ޔުނިވާސް 2024 ގެ ތާޖު ހާސިލުކޮށްފަ އެވެ. މިއާއެކު މި ފަހަރު މީ ޑެންމާކުން މިސް ޔުނިވާސް ކާމިޔާބުކުރި ފުރަތަމަ ފަހަރެވެ.

21 އަހަރުގެ ވިކްޓޯރިއާ އަކީ ނެށުންތެރިއެއް އަދި އަމިއްލަ ވިޔަފާރިކުރުމުގެ އިތުރުން ހުނަރުވެރި ގާނޫނީ ވަކީލެކެވެ. އޭނާ މި މުބާރާތް ކާމިޔާބު ކޮށްފައި މިވަނީ 120 ބައިވެރިންނާއި ވާދަކޮށްގެނެވެ.

މެކްސިކޯގައި މިއަދު ބޭއްވި މުބާރާތުގެ ފައިނަލްގައި ވާދަކޮށްފައިވަނީ ނޮވެމްބަރު 14 ވަނަ ދުވަހުގެ ރޭ ބޭއްވި ޕްރިލިމިނަރީ ރައުންޑުން ހޮވާލެވުނު 30 ބައިވެރިންނާއެކު އެވެ. އެ ރައުންޑުގައި ވަނީ ބައިވެރިން ނިސްބަތްވާ ގައުމީ ހެދުމާއި ސުވިމްސޫޓު ދައްކާލާފަ އެވެ. އެއަށްފަހު އޭގެ ތެރެއިން ހޮވާލެވުނު 12 ބައިވެރިން ވަނީ ގައުން ރައުންޑުގައި ފެނިގެން ގޮސްފަ އެވެ.

ވިކްޓޯރިއާގެ އިތުރުން ފައިނަލްގައި ވާދަކުރި ފަސް ބައިވެރިންނަކީ ފަސްޓް ރަނަރަޕް ގޮތުގައި ހޮވުނު މިސް ނައިޖީރިއާ ޗިޑިންމަ އަޑެޓްޝިނާ އާއި ދެވަނަ ރަނަރަޕް ގޮތުގައި ހޮވުނު މިސް މެކްސިކޯ މަރިއާ ފެނަންޑާ އާއި، މިސް ތައިލޭންޑް ސުޗިތާ ޗުއަންސްރިގެ އިތުރުން މިސް ޔުނިވާސްގެ ތާރީހުގައި ވެސް ފުރަތަމަ ފަހަރަށް ފައިނަލަށް ހޮވުނު 28 އަހަރުގެ މަންމަ އެއް ކަމަށްވާ މިސް ވެނިޒުއެލާ އިލިއާނާ މާކުއެޒް ޕެޑްރޯޒާ އެވެ.

މި އަހަރަކީ މިސް ޔުނިވާސް އިން މުޅިން އަލަށް 28 އަހަރުން މަތީގެ އަންހެނުންނަށްވެސް ބައިވެރިވެވޭގޮތަށް މުބާރާތް ކުރިއަށް ގެންދިޔަ ފަހަރެވެ. އެ ގޮތުން ފައިނަލަށް ދަތުރުކުރި މީހުންގެ ތެރޭގައި 28 އަހަރުން މަތީ މީހުން ހިމެނެ އެވެ. މިސް މަލްޓާ، ބިޓްރިސް ޖޯޔާ އަކީ ގްރޭންޑް ފިނާލޭއާ ހަމައަށް ދަތުރުކުރި 40 އަހަރުގެ ބައިވެރިއެއްކަން ފާހަގަކޮށްލެވެ އެވެ.

މި އަހަރުގެ މިސް ޔުނިވާސްގައި ރާއްޖެ އިން ފުރަތަމަ ފަހަރަށް ވަނީ ބައިވެރިވެފަ އެވެ. އެ ގޮތުން ރާއްޖެ ތަމްސީލުކުރި 21 އަހަރުގެ މަރިޔަމް ޝައިނާ ނަސީމް ވަނީ ފަހުރުވެރިކަމާއެކު ރާއްޖެ މުޅި ދުނިޔެއަށް ދައްކާލައި ތާރީހުގައި ނަން ފަވާލާފަ އެވެ.