އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށައަޅާފައިވާ ބަޖެޓްގެ ބަހުސް މިއަދު އެއްކޮށް ނިންމާލާނެ ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

މަޖިލީހުގެ މިއަދުގެ ޖަލްސާ ފަށްޓަވައި މަޖިލީހުގެ ރައީސް ވިދާޅުވީ ބަޖެޓަށް ބަހުސްކުރުމަށް އެދިވަޑައިގެންފާއިވާ ހުރިހާ މެންބަރުންނަށް މިއަދު ފުރުސަތުދީ ބަހުސް މަރުހަލާ ނިންމާލައްވާނެ ކަމަށެވެ. އެގޮތުން މިއަދު ހެނދުނު 9:30 އާ ހަމައަށް ބަޖެޓަށް ބަހުސްކުރުމަށް އެދިވަޑައިގަތުމުގެ ފުރުސަތު އޭނާ ދެއްވި އެވެ.

ފިނޭންސް މިނިސްޓްރީން އަންނަ އަހަރަށް ލަފާކޮށް ހުށައަޅާފައިވަނީ 56.6 ބިލިޔަން ރުފިޔާގެ ބޮޑު ބަޖެޓެކެވެ. އެ ބަޖެޓް މަޖިލީހަށް ހުށަހެޅީ މިދިޔަ މަހުގެ 31 ވަނަ ދުވަހު އެވެ. މީގެ ތެރެއިން، ހަރަދުގެ ގޮތުގައި ހިނގާނެ ކަމަށް ބުނެފައި ވަނީ 49.2 ބިލިޔަން ރުފިޔާ އެވެ. އޭގެ ތެރޭގައި ހިމެނެނީ ރިކަރަންޓް ޚަރަދުގެ ގޮތުގައި 35.9 ބިލިއަން ރުފިޔާ އެވެ. އަދި ކެޕިޓަލް ޚަރަދުގެ ގޮތުގައި 13.3 ބިލިޔަން ރުފިޔާ އެވެ.

އަންނަ އަހަރުގެ ބަޖެޓުގައި ޕަބްލިކް ސެކްޓާ އިންވެސްޓްމަންޓު ޕްރޮގްރާމް (ޕީއެސްއައިޕީ) އަށް ހިނގާނެ ކަމަށް ލަފާކޮށްފައި ވަނީ 12.4 ބިލިޔަން ރުފިޔާ އެވެ. އަދި ޖުމްލަ އާމްދަނީ އާއި ހިލޭ އެހީގެ ގޮތުގައި ދައުލަތަށް ލިބޭނެކަމަށް ލަފާކޮށްފައި ވަނީ 39.7 ބިލިއަން ރުފިޔާ އެވެ.

އަންނަ އަހަރުގެ ބަޖެޓްގައި ޚަރަދު ކުޑަކުރަން އަޅާ ފިޔަވަޅުތަކުން 6.6 ބިލިޔަން ރުފިޔާ ކުޑަކުރެވޭނެ ކަމަށް ލަފާކޮށްފައިވެ އެވެ. އަދި 2025 ވަނަ އަހަރު ބަޖެޓުގައި އަހަރުގެ ތެރޭގައި ރިފޯމުތައް ތަންފީޒުކުރަން ހިމަނާފައިވެ އެވެ.

އެއްވެސް މަޝްރޫއެއްގެ ތަފުސީލެއް ނެތަސް އަންނަ އަހަރުގެ ބަޖެޓަކީ ޒިންމާދާރު ބަޖެޓެއް ކަމަށް ސަރުކާރުން ބުނެ އެވެ. އެގޮތުން އަންނަ އަހަރަށް ލަފާކުރަނީ 9.4 ބިލިޔަން ރުފިޔާގެ ޑެފިސިޓެކެވެ. ނަމަވެސް އަހަރު ނިމޭއިރު މި ޑެފިސިޓް މިއަށްވުރެ އެތައް ގުނައެއް ބޮޑުވާނެ ކަމަށް ލަފާކުރެ އެވެ.