ރައްޔިތުންގެ މަޖިލީހަށް ހުށަހަޅާފައިވާ އަންނަ އަހަރަށް ލަފާކުރާ ބަޖެޓު އަނބުރާ ގެންދިއުމަށް މީދޫ ދާއިރާގެ މެންބަރު އަހުމަދު ސިޔާމް މުހައްމަދު ގޮވާލައްވައިފި އެވެ.

މިއަދު މަޖިލީހުގައި ކުރިއަށްދާ ބަޖެޓު ބަހުސްގައި ސިޔާމް ވަނީ ހުށަހަޅާފައިވާ ބަޖެޓުގައި ހަރަދު ކުރާނެ ގޮތުގެ ތަފުސީލު ހިމަނާފައި ނެތުމުން އެކަމާ ނުރުހުން ފާޅުކުރައްވާފަ އެވެ.

އަންނަ އަހަރަށް ލަފާ ކުރާ ބަޖެޓު މަޖިލީހަށް ހުށަހެޅިއިރު، ހުރީ ދާއިރާތަކަށް ކަނޑައެޅި އަދަދެވެ. ހަރަދު ކުރާނެ ޕްރޮޖެކްޓްތަކުގެ ތަފުސީލު ހިމަނާފައިނުވެ އެވެ.

ސިޔާމު ވިދާޅުވީ ބަޖެޓުގައި ޖުމްލަ 56 ބިލިއަން ރުފިޔާ ހުށަހަޅާފައިވާކަމަށް އޮތް އިރު، އެ ފައިސާ ހަރަދުކުރާނެގޮތް އެނގެން ނެތްކަމަށެވެ. އެހެންކަމުން މުޅި ބަޖެޓް ބަދަލުކޮށް، ތަފްސީލު އެނގޭނެގޮތަށް އަލުން ހުށަހެޅުމަށް ގައުމުގެ ރައްޔިތުންގެ ހައްގުގައި ހުށަހަޅުއްވާކަމަށެވެ.

"އެހެން ނޫނީ އަޅުގަނޑުމެންނަށް ނޭނގި ހުރެ އެއްޗަކަށް ވޯޓު ދެވުނީމާ ގިޔާމަތް ދުވަހުން ވެސް އެކަމުގެ އަޒާބު އަޅުގަނޑުމެންނަށް ﷲ ސުބްހާނަހޫ ވަތައާލާ ދެއްވާނެ. މި ބަޖެޓަކީ ސައްތައިން ސައްތަ ރަނގަޅު އެއްޗެކޭ ބުނަން ހެޔޮ ވެސް ނުވާނެ" ސިޔާމް ވިދާޅުވި އެވެ.

އަންނަ އަހަރަށް ލަފާކޮށް ހުށަހަޅާފައި ވަނީ 56.6 ބިލިއަން ރުފިޔާގެ ބަޖެޓެކެވެ. އެއީ މި އަހަރުގެ ސަޕްލިމެންޓާ ލައިގެން ބަޖެޓު ކުރި 54.9 ބިލިއަން ރުފިޔާއަށް ވުރެ 1.7 ބިލިއަން ރުފިޔާ އިތުރު އަދަދެކެވެ.

ކައުންސިލްތަކަށް ދިނުމަށް ގާނޫނީ ގޮތުން ކަނޑައަޅާފައިވާ މިންވަރަށްވުރެން މަދުން ބަޖެޓުގައި ހިމަނާފައި ވުމުންވެސް ކައުންސިލްތަކުން ދަނީ ކަންބޮޑުވުން ފާޅުކުރަމުންނެވެ.

އެގޮތުން ދައުލަތުގެ ބަޖެޓުގެ ޖުމްލަ އާމްދަނީ ކަމަށް ލަފާ ކުރާ މިންވަރުގެ ފަސް ޕަސެންޓު މަދުވެގެން ކައުންސިލުތަކަށް ހާއްސަ ކުރަންޖެހޭ ކަމަށް ބަޔާން ކޮށްފައި އޮންނައިރު، ހުށަޅާފައިވާ ބަޖެޓްގެ ފަސް ޕަސެންޓަކީ 1.7 ބިލިއަން ރުފިޔާ އެވެ. ނަމަވެސް ކައުންސިލްތަކަށް ދިނުމަށް ބަޖެޓްގައި ޖަހާފައިވަނީ 1.4 ބިލިއަން ރުފިޔާ އެވެ.